Borgmesteri: Imigassallersinnaanermut akuersissut nalilersoqqilerparput

Kommuneqarfik Sermersuummi Tasiilami imerniartarfinni imigassallersinnaanerminut aalajangernerminik nalileeqqinnialerpoq.

Tasiilami imerniartarfik aamma diskotekki ammasarfii septembarip naalernerani nalunaaqutaq unnuap qeqqanut killilerneqassasut aalajangerneqarpoq.

Tamanna pivoq Kommuneqarfik Sermersuumi aningaasaqarnermut inuussutissarsiornermullu ataatsimiititalimi amerlanerussuteqartut - Inuit Ataqatigiit aamma Siumut - imerniartarfiutilik, Mike Nicolaisen, imigassallersinnaanermut akuersissummik nutaamik, nalinginnaasumik ukiunut pingasunut atuuttaraluartumik aamma ukiumut ataatsimut atuuttussamik tunimmassuk.

Amerlanerussuteqartut aalajangernerat ilaatigut politiinut tusarniaareernermi akissutigineqartut aallaavigalugit pivoq.

Aalajangernerli isorineqangaatsiarpoq. Ilaatigut imerniartarfiutilimmit, innuttaasunillu tallimanngornermi atsiornernik katersillutik aallartittunit. Kisianni aamma Kommuneqarfik Sermersuumi Demokraatit ilaasortaatitaasa aappaanit, Tasiilameersumit Justus Hansenimit.

- Aaqqissuussaasumik ingerlanneqarpoq. Imerniartarfimmi sulisoqarpoq matulerisoqarlunilu. Aamma ammasarnera unnuap qeqqanut killilerneqarpat tamanna angerlarsimaffinni meeqqat inuusuttuaqqallu akornanni ernguttoqartalerneranik kinguneqassaaq. Tasiilami meeqqanik atornerluisarneq taama ukkatarineqartigitillugu  ernummatigaara meeqqat atornerlunneqarnerannut una annertusaataasinnaasoq, Justus Hansen oqarpoq.

Justus Hansenip ataatsimiititaliami ammasarfiit sivikillisinneqarnerat akuerinagu taasinikuuvoq.

AAMMA ATUARUK Tasiilaq: Imerniartarfiutillip kommuuni suliassanngortikkusukkaa

Piginnittup, innuttaasut aamma Justus Hansenip isornartorsiuineri Kommuneqarfik Sermersuumi aningaasaqarnermut inuussutissarsiornermullu ataatsimiititaliami amerlanerussuteqartut isumaannik maanna allanngortitsisimagunarput.

Kommuneqarfik Sermersuummi borgmesteria, Charlotte Ludvigsen, ataatsimiititaliap aalajangernini nalilersoqqinnialeraa ilisimatitsivoq.

- Taanna unnuap qeqqanut matusisarneq malugisinnaavarput innuttaasuninngaanniit aammalu piginnittuminngaanniit naapertuuttutut isigneqanngitsoq. Tasiilami innuttaasut oqaloqatigiuarneratigut aaqqiissuteqarusuttarpugut, taamaattumik aamma takusinnaavarput nalilersoqqittariaqaripput, Charlotte Ludvigsen oqarpoq. 

Kommuneqarfik Sermersuumi aningaasaqarnermut inuussutissarsiornermullu ataatsimiisitaliap imigassallersinnaanermut akuersissut ullumi marlunngornermi immikkut ataatsimiinnermi eqqartoqqinniarpaa.