Ataatsimiititaliap Nivi Olsen isornartorsiorpaa
Narsami meeqqat atuarfiannik uparuaaneq Inatsisartuni Siumumit ilaasortap Vivian Motzfeldtip, Ilinniartitaanermullu ataatsimiisitaliami siulittaasuusup, pissusissamisuunngitsutut isigaa.
- Isornartorsiuinerput aallaaveqarpoq pissusissamisoortutut isiginnginnatsigu oqaluttarfiup pingaarnersaanninngaanniit ammut saallunilusooq tikkuartuiinnarluni uku iluarsisariaqarput, uku imaattariaqarput illuatungaatigullu nammineq toqqaannartumik qanoq iliuuseqarnissaminut tunuarterluni, Vivian Motzfeldt oqarpoq.
Aamma atuaruk NIVI OLSEN: Aqutsisut sivisuallaamik issiasimasut ajornartorsiutaapput
Narsami meeqqat atuarfianni atuartut inaarutaasumik misilitsikkamik angusisimannginnerarlugit Ilinniartitaanermut naalakkersuisup Nivi Olsenip, Inatsisartut oqaluttarfianni apeqqarissaarfigitinnermini oqaatigaa. Tamannalu kukkusuusoq Suka K. Frederiksenip naalakkersuisumut apeqquteqaataanut akissutaani paasinarsivoq. Tassami Narsami atuartut agguaqatigiisillugit karakterii 2,025-miittut Ilinniartitaanermi naalakkersuisup akissutaani erserpoq.
Naalakkersuisup kukkusumik paasissutissiisimanini utoqqatsissutigaa, taamaattorli atuartut angusaat naammaginannginnerarlugit erseqqissarlugu.
Naalakkersuisup naammaginannginneraanerata kinguneranik Vivian Motzfeldtip kajumissaarpaa akisussaaffimmik tiguseqataaqqullugu naak meeqqat atuarfii kommuninit akisussaaffigineqaraluartut.
- Piffissaq sivitsortoq meeqqat atuarfiat oqallisigivarput kisianni qiterpiaa tikissanagu isumaqarpunga piffissanngortoq nalilersuiffigineqarnerani tassunga attuumassuteqartut tamaasa peqataatillugit siunnerfimmik ersarinnerusumik oqallittariaqartugut, Vivian Motzfeldt oqarpoq.
Aamma atuaruk Meeqqat atuarfianni soraarummeertut affaasa missaat oqaatsinik angusinngitsoortarput
Narsap atuarfiani atuartut angusarissaannginnerinut peqqutaasut, taavalu naalakkersuisup oqaluttarfimmit atuarfimmik aalajangersimasumik uparuaanera isornartorsiorlugu Narsap atuarfiani pisortaq Naalakkersuisumut ammasumik allagaqarpoq. Ilaatigut aqutsisut taarseraannerujussuinik peqquteqartoq, Narsami atuarfiup pisortaa allappoq.
