NIVI OLSEN: Aqutsisut sivisuallaamik issiasimasut ajornartorsiutaapput
Taamatulli oqarnera Ilinniartitsisut meeqqat atuarfianneersut kattuffianiit IMAK-imiit assuarineqarpoq.
- Nivi Olsenip pisortat ataasiakkaat pillugit kommunit oqaloqatigisinnaanngilai, taanna akulerunnerussooq tulluutinngitsoq, Sivso Dorph IMAK-imi siulittaasoq taama oqarpoq.
Naalakkersuisut atuarfeqarfiit pillugit pilersaarutaat Nivi olsenip KNR radiomit ullaap tungaani oqaloqatigineqarnermini erseqqissaavoq nunatsinni unamminartorujussuaq tassaasoq atuarfeqarfinni aqutsisut.
- Nunatsinni ilisarnaatigisarparput amerlasuutigut inuit sivisuallaamik issiasimasut allanngortikkuminaattorujunngortarnerat, taanna unamminartorujorujussuuvoq, Ilinniartitaanermut Naalakkersuisoq Nivi Olsen taama oqarpoq.
Atuarfeqarfiit aaqqinniarneranut suliarineqartut killiffigaat meeqqat atuarfianni aqutsisuusut pillugit Naalakkersuisunit kommunit oqaloqatigineqarnerat. Tassani Nivi Olsenip paaserusuppaa atuarfeqarfinni aqutsisut naammaginartumik naammassinnissinnaanngippata sooq iliiuseqarfigineqarsimannginnersut:
- Suliffeqarfissuarmi aningisuumi aqutsisut suliammik naammassinninngikkaangata peerneqartarput piaarnerpaamik, taava uanga meeqqat atuarfii isigivakka Nunatta siunissami qanoq inissisimanissaanik aqutsisuupput, atuarfik iluatsinngilluinnartoq ikattorpassuarnik peqquteqarsinnaavoq, kisianni uanga isumaqarpunga akissussaaffik annertoorujussuaq meeqqat atuarfiisa ittuisa paarigaat, taamaattumik isiginninngittuusaaginnarsinnaanngilagut suliaminnik naammassinngippata, Ilinniartitaanermut Naalakkersuisoq Nivi Olsen taama oqarpoq.
