Meeqqat atuarfianni soraarummeertut affaasa missaat oqaatsinik angusinngitsoortarpu

Meeqqat atuarfianni atuartut angusinngitsoortorpassuit, ilinniartitaanermut naalakkersuisup Nivi Olsenip quarsaarutigai. Sermitsiaq tallimanngormat saqqummersoq taama allaaserisaqarpoq.

Meeqqallu atuarfianni soraarummeertut oqaatsinik ajornakusoortitsisorujussuunerat matumani maluginiagassaavoq.

Qeqqata Kommuniani Qaasuitsullu Kommuniani atuartut ataatsimut isigalugu affaasa missaat oqaatsinik ajornakusoortitsisut kisitsisit takutippaat, tamaanimi meeqqat atuarfianni soraarummeertut affaat qallunaatut tuluttullu soraarummeeraangamik angusinngitsoortarput.

Kommuneqarfik Sermersuumi atuartut ataatsimut isigalugu soraarummeernermi angusarissaarnerusarput, pingaartumik Nuummi atuartut.

Atuartut ataatsimut isigigaanni matematikimik ilaatigut ajornakusoortitsisartut kisitsisit aamma takutippaat. Atuarfiit tamarmik 2014-imut kisitsisinik Inerisaavimmut nalunaarutigisaanni tamanna tassa takuneqarsinnaavoq.

- Angusat taama ajortiginerat quarsaarutigaara. Danmarkimeeqqammerpunga tassanilu DTU-mi ingeniørinngorniartut oqaloqatigaakka, taakkulu ilinniarnerminni angusaqassagunik danskit tuluillu oqaasiinik piginnaasariaqarnissartik oqaatigaat, nalunaarusiammi danskisut allanneqartartussaapput, atuakkallu atuartagaat tuluttuujullutik, Ilinniartitaanermut Naalakkersuisoq Nivi Olsen Sermitsiamut oqarpoq.

Meeqqat atuafianni inaarutaasumik misilitsinneq atuartut ilinniaqqinnerannut sunniuteqarneq ajorpoq. Misilitsinnerlu eksameniunngilaq angusaqarluniluunniit angusinngitsoorfiusinnaasoq. Atuartulli piginnaanerannik ilinniagaqaqqinnerminnilu sunik unammilligassaqarlutillu aporfeqarnerannik taanna takutitsisuusarpoq. Sermitsiaq taama allaaserisaqarpoq.