Ataatsimiinnerup kingorna: Borgmesterinngortussaq pillugu oqaaseqarusunngillat
Charlotte Ludvigsenip Kommuneqarfik Sermersuumi borgmesteritut kina kingoraartigissavaa ?
Apeqqutip taassuma akissutissarsinissaanut Sermersuumi IA gruppemit oqaatigineqarusunngilaq.
I A-p kommunalbestyrelsemi ilaasortaatitaat ippassaq ataatsimiipput, tassani kina borgmesterissatut innersuunneqarnersoq oqaluuserineqarluni, ullumilu tamanna pillugu IA gruppeannit oqaatigineqarusunngilaq.
AAMMA ATUARUK Illutungiliuttut borgmesterip tunuarnera pillugu: Tupaallannartuunngilaq naapertuilluarneruvorli
Gruppemi siulitaasoq Juaaka Lyberth KNR-imit oqaaseqartinniarneqaraluarpoq. Taannali oqaaseqarusunngilaq, aqagu kommunalbestyrelsemi oqaluuserineqareerpat aatsaat oqaaseqarsinnaanerarluni.
IA sinnerlugu kmmunalbestyrelsemi ilaasortaq Uju Petersen aamma taanna oqaaseqarusunngilaq, partiip kina borgmesterissatut toqqarneraa pillugu.
Juaaka Lyberth kommunalbestyrelsemut siorna qinersinermi 435-nik qinerneqarpoq, Uju Petersen 374-nik qinerneqarluni.
Taakkua qinerneqarnerpaat tulliattut pingajuattullu inissipput, Charlotte Ludvigsen qinerneqarpaagami 1512-nik qinerneqarami.
Tassanngaannaq borgmesteritut tunuartoq
Charlotte Ludvigsen kommunemi borgmesterinngorpoq juunimi 2019-mi, parteeqataa Asii Chemnitz Narup kingorarlugu.
Men fredag meddelte hun som bekendt, at hun trækker sig fra posten som borgmester i kommuneqarfik Sermersooq.
Charlotte Ludvigsenip tallimanngormat nalunaarutigaa, kommuneqarfik Semersuumi borgmesteritut tunuarniarluni.
Taama aalajangerpoq kommunimi inissiat pillugit suliat ajorluinnartut sakkortuunillu isornartorsiusoqarnerata kingorna.
Paasissutissat: Ineqarneq pillugu periuserineqartoq malittarisassanik unioqqutitsisoq
Ulloq 9. novembari 2021 Namminersorlutik Oqartussat Nakkutilliisuisa kommunip ingerlatsivinnut namminersortunut sivisuumik atuinissamut isumaqatigiissuteqaqqinnissaa unitsippaat, tassani kommunip inissiat nalinginnaasutut Iserit aqqutigalugu attartorteqqittarai.
Periaaseq taanna kommunip 2015-imiilli inissianik pissarsiniarluni atortarsimavaa.
Nakkutilliisut nalilerpaat periaaseq taanna kommuninut pisinnaatitsisummik uniuinerusoq.
Borgmesterip, Charlotte Ludvigsenip kommunimi ataatsimiititaliap isumagisimanngisaanik 20 millionit koruuninik atornissaq akuerinikuusimagaa siorna novembarimi saqqummersinneqarpoq.
Aningaasat atukkat kommunip inissiaatileqatigiiffiata Iserip inissianik 2025-mi pisisinnaanissaanut atorneqartussaapput.
20 millionit koruuninullu allanut tunngasumik suliamik politikkikkut aamma akuerineqanngitsunik ullumi saqqummertoqaqqippoq. Tamatumuuna asfaltiliorfimmik Munck Gruppenimit 2020-mi pisineruvoq, isumaqatigiissut taanna borgmesterip kommunalbestyrelsip suliamik isumaginninnginneratigut atsiorsimavaa.
Taama pisoqarnera pissutigalugu, borgmesterip kingoraartissaanik IA toqqaasariaqalerpoq, tamannalu pillugu IA oqaaseqarusunngilaq.
Kommunalbestyrelsemi Naleraq aamma IA suleqatigiipput.
Finn Karlsen Naleraq, taanna KNR-imut oqarpoq, partiit taakkua marluk ullumi ataatsimeeqatigiissasut IA-illu illimatitsissutigissagaa, kina borgmesterissatut innersuunnerlu.
- Partiip IA-p nammineerluni aalajangissavaa kina borgmesterissatut innersuunnerlugu, Finn Karlsen oqarpoq.
Charlotte Ludvigsen borgmesterimik innersuussinissaq pillugu tallimanngormat ima oqarpoq:
- Gruppitta, Inuit Ataqatigiit Naleqqakkullu borgmesteritut taartissannik nalunaarumaarput. Kommunalbestyrelsimi marlunngorpat sammisussaavarput, Charlotte Ludvigsen taama oqarpoq.
Marlunngornermi paasinarsissaaq
Kommunalbestyrelse aqagu marlunngornermi ataatsimiissaaq.
Finn Karlsenip oqarnera naapertorlugu, kina borgmesteritut toqqarneqassanersoq aalajangertoqqassaaq.
IA aamma Naleraq kommunalbestyrelsemi amerlanerussuteqarput, IA qulingiluanik kiisalu Naleraq marlunnik ilaasortaatitaqartoq.
Charlotte Ludvigsenip nalunaarutiginikuuaa juunip ulluisa 15-ata tungaanut borgmesteriussalluni.
