Ataataasoq erneralu ilisimannittussarsiortut: Kiap qimmigut toquppai?

Henrik Olsvigip erneratalu aqqanilinnik ukiullip Ilulissani sapaammi marsip ulluisa arfineq-aappaanni qimussernerat iluatseqaaq.

Taassuma ernera Avannaata Qimussersuinut marsip ulluisa 25-anni peqataanissaminut sungiusarpoq.

Henrik Olsvigilli Miilu Olsvigillu qimmitik marluk Atersuarni toqungasut ataasinngornermi marsip ulluisa arfineq-pingajuanni nassaaraat.

- Ualikkut soraarama ernera ilagalugu nerisitsiartorpugut. Taava nerisitsiartornitsinni qimmit ilanngui qunullereersimasut. Sunaaffami ajortoqarmat. Qimmit marluk toqusimapput, ataaseq ningioqutaa niuatigut immaqa annerserujussuaannarsimagamiuk, Henrik Olsvig oqarpoq.

Miilup qimmini toqungasut takullugit aliatsassimaqisoq angutaata oqaatigaa.

- Assorujussuaq qisuariarpoq. Soorunami qissasiinnartunnguuvoq, uku nammineq qimminnguaarigamigit. Mikisunnguugami nammineq nakkutigisaramigit. Aliasussimaqaaq ullut taakkunani. Tassa taakkua Avannaata Qimmussersuinut atortussaagaluaramigit, ukiarli sungiusakkani, Henrik Olsvig oqarpoq.

Henrik Olsvig arlaannik pisumut takunnittoqarsimanersoq ilisimasaqartoqarnersorluunniit kingornatigut paasiniaasimagaluarpoq.

Qimmit ataasinngornerup unnuaani toqunneqarsimanissaat taassuma ilimagaa. Henrik Olsvigip oqarnera naapertorlugu nivaatamik toqunneqarsimapput.

- Inuup taassuma ima unatarsimatigigamiuk, siulliiata talia saamerleq saarnga katattillugu, taavalu kingulliia talerperleq aamma nallorsimagallugu. Pingajuallu ningioqutaat anersakuttuuginnarsimavaa.

Maannakkumut pasisaqartoqanngitsoq

Taassuma pisoq ullut sisamat qaangiunneranni politiinut nalunaarutigaa. Tassunga atatillugu nutaamik maannakkut paasissutissaqanngilaq. Tamanna Kalaallit Nunaanni Politiit sisamanngornermi uppernarsarpaat.

- Qimmit qimuttut pingasut saassunneqarnerannut taakkunanngalu marluk toquneranut ataatsillu ajoqusingaatsiarneranut atatillugu suliaqarluta uppernarsarsinnaavarput, politiit attaveqarnermi immikkoortortaqarfianneersoq oqarpoq.

- Qimminik saassussineq Ilulissani qimmeqarfimmi Atersuarni pivoq. Politiit suliamut atatillugu maannakkut pasisaqanngillat, taamaammat piffissami marsip ulluisa arfernanni arfineq aappaanilu sapaatip akunnerata naanerani pasinartumik takunnissimaguit, Ilulissani politiinut oqarasuaammut 701422-mut attaveqarnissat kaammattuutigaaput.

Miilu nalaatani suli malugisinnaagaa

Naalli Miilu avaanngunartuumik misigisaqaraluarluni ullumikkut ajunnginneruvoq.

- Qujanartumik inunnguaqarami ajunngittunik. Arnap nutarannguanik pingasunik tunigavaa. Taakkuninnga tunineqarami assorujussuaq nuannarutigivaa.

- Inuttanngua qilanaartorujuuvoq assut Avannaata Qimmussersuinut, Henrik Olsvig oqarpoq.

Pisorli Miilup suli puiguissinnaanngikkaa oqaatigaa.

- Tassa malunnalaarpoq kamalaartarnera, taamanngikkaluarami. Oqaasinnguilaartarpoq ullormut qanoq pisoqarsimaneranik.