Assit: Ukiut qinigaaffiusut naangajalersut, ukiakkullu ataatsimiinneq aallartinneqartoq

Politikikkut ataatsimiinneq nutaaq naalagiaqatigiinnermik silallu minineranik aallartinneqarpoq.
Inatsisartut saanni ataatsimut assilisuttut. Assi © : Ulrikke Andersen, KNR
Naalakkersuisut minisumi taarujuttumilu. Inuussutissanut, niuernermut, aatsitassanut, inatsiseqarnermut naligiissitaanermullu naalakkersuisoq, Naaja Nathanielsen (IA) aallaqqavoq. Assi © : Ulrikke Andersen, KNR
Demokraatinit Nivi Olsen (saamerleq) naalagiaqatigiinnermi. Annaassisitta Oqaluffiani Nuutoqqami nalinginnaasumik naalagiarfiusartumi naalagiartoqanngilaq - taannami nutarterneqarpoq. Taamaammat qinikkat bussinik Nuummi illoqarfiup qeqqanut Hans Egedep Oqaluffianut busserput. Assi © : Nicole Sander Bertelsen, KNR
Hans Peter Poulsen Siumumeersoq saamerleq, Naleqqamiillu Jens Napãtôk talerperleq. Assi © : Nicole Sander Bertelsen/KNR
Siulittaasup siulliupput: Naalakkersuisut siulittaasuat, Múte B. Egede (IA) parteeqatini Inatsisartuni siulittaasoq Mimi Karlsen ilagalugu. Assi © : Nicole Sander Bertelsen/KNR
Allattoq Christine Hyldal, Nicole Sander Bertelsen
septembarip 20-at 2024 13:10
Nutserisoq Connie Fontain

Inatsisartut ukiakkut ataatsimiinnerat nalunaaqutaq 11.20 aallartinneqarpoq. Ukiakkut ataatsimiinneq qinersisussanngoqqinnginnitsinni aamma kingulliuvoq.

Ullorli ileqqoq malillugu aallartinneqarpoq: Inatsisartuni ilaasortat kalaallisoorlutik naalagiaqatigiikkiartorput. Nuutoqqamili Aannaassisitta Oqaluffianut pisarnertut naalagiariartortoqanngilaq – taannami nutarterneqaleruttorpoq. Qinikkalli Nuummi illoqarfiup qeqqanut busserlutik Hans Egedep oqaluffianut naalagiariartorput.

Oqaluffik kiattoq

Oqaluffimmi naalagiarnerup nalaani pingaartumik arnat tussiutinik assaminnillu arlaarsarrapput. Tamatuma kingorna bussinik Inatsisartunut ingerlaqqipput, ukiakkullu ataatsimiinneq aallartinneqarluni.

Ukiakkut ataatsimiinneq marlunnut avinneqarnikuuvoq. Immikkoortumi siullermi septembarip 20-anit novembarip 21-anut ataatsimiittoqassaaq, immikkoortullu aappaani aappaagu februaarip sisamaani februaarip 19-iannut ataatsimiittoqassalluni.

Ataatsimiinnissamut ullut nalinginnaasumik 20-nit 25-usartut maannakkut 30-t pilersaarutigineqarput.

Sullivinnik nakkutilliisut isornartorsiuisut

Sullivinnik nakkutilliisut Inatsisartuni sulisut sulerulunnerannik juunimi isornartorsiuinerata kingorna taama inissiisoqarpoq. Taakku ulapippallaarput, qinikkallu aamma ulapippallaartut oqaatigineqarpoq.

Politikkikkut ataatsimiinnermik aatsaat siullermeertumik avitsisoqanngilaq. 2021-mi ukiakkut ataatsimiinneq aamma avinneqarpoq, tassani ukiakkut ataatsimiittoqartussanngortitsoqarpoq. Tamannali 2021-mi apriilimi qinersisoqartussanngornera pissutigalugu taamaatiinnarneqarpoq.

Kingusinnerpaamik aappaagu apriilip arfernani qinersisoqassaaq. Inatsisartunilu ukiakkut ataatsimiinnermi matumani tamanna malunnaataassasoq, KNR-ip politikkikkut oqaaseqartartua, Ineqi Kielsen isumaqarpoq.

- Takusinnaavarput inatsisartunut ilaasortat arlalinnik siunnersuuteqartut. Taakkulu immaqa aamma takussutissiisinnaapput qinersinerup qanillilernerani innuttaasunut qanimut sulisimanertik ersersinniaraat, taanna septembarip aqqaneq-aappaani oqarpoq. 

Politikerit ukiakkut ataatsimiinnermi matumani sunik oqaluuserisassaqarnerusut uani annerusumik atuarsinnaavat.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk

Greenland Ruby akiliisinnaajunnaartoq

Nuummi inuusuttuuneq pillugu atuakkiortoq Debora H. Kleist atuakkamik saqqummersitsivoq.

Ritzau

USA Ukrainep illersornissaqarfianut ikiorsiissuteqartoq