Nuup aqquserngatigut inuit 50-it missaanniittut ingerlaaqatigiipput. Taakku arnanut spiralilersuisoqarneranit eqqugaasimasunut tapersersuinerminnik takutitsiniarlutik ingerlaaqatigiipput.

Ane Amalie Kuitse ingerlaaqatigiissitsisuuvoq. Taassuma ingerlaaqatigiinnissaq arnat ullumikkut ulluannut atatillugu aaqqissuussimallugu oqaatigaa.

- 8. marts aallaavigalugu ingerlaaqatigiitsitserussimavunga, spiralilertissimasut taakku aallaavigalugit, taanna oqarpoq.

Nuummi Katersortarfimmit Inatsisartut allaffeqarfiata tungaanut ingerlaaqatigiinneq nalunaaqutaq ataatsimut aallartippoq.

Ane Amalie Kuitse har planlagt demonstrationen og talte foran Inatsiartut fredag 8. marts. Assi © : KNR / Johasinnguaq Olsen

Ane Amalie Kuitsep taama takkutsigisoqarnissaa naatsorsuutigisimanngikkaluarpaa, takkuttoqarluarneralu nuannaarutigaa.

- Killitsinnarpoq, attortinnarpoq, kisianni aamma misiginarpoq ataatsimoorluta nukittoqatigiissinnaasugut, taanna oqarpoq.

Nukissamik tunisisoq

Naja Lyberthip 1976-imi 14-inik ukioqarluni nammineq piumassuserinngisaminik spiralilernerminik siulliulluni tamanut oqaluttuaqqaartuuvoq.

Taanna arnanut danskit naalagaaffiannik inuit pisinnaatitaaffiinik innarliisimasutut eqqartuussilersuussisunut oqaaseqartartuuvoq.

Taassuma arnat Nuup aqquserngatigut ullumi ingerlaaqatigai.

Naja Lyberth var blandt de fremmødte til dagens demonstration. Hun er talsperson for gruppen af kvinder, som har stævnet den danske stat for brud på menneskerettigheder. Assi © : KNR / Johasinnguaq Olsen

- Nuanneq, pilluaammernarpoq tapersersorneqarlutik arnaqaterpassuatsinnik, Naja Lyberth oqarpoq, taassumalu angutinik arlalinnik aamma takkuttoqarsimanera maluginiarpaa.

- Assorujussuaq pissatsinnarpoq. Kiisami killiliisimalluta, inuusuttuaraalluta killiliisinnaasimanata massakkut killiliisinnaanngorsimalluta. Qamanngaanniit uummammit pilluaammernartorujussuuvoq.

Inatsisartut silataanni qinikkat arlallit ingerlaaqatigiittut qanoq oqaasissaqarnerannik tusarnaariartorput. Ane Amalie Kuitsep spiralilersuisoqarnera arnanut eqqugaasimasunut qanoq kinguneqarsimanera oqaluuseraa.