Tusagassiorfiit: Aqqartartoq ukrainemiu 44-nik ukiulik Nord Streaminik qaartitsisimasutut pasineqartoq

Aqqartartoq ukrainemiu 44-nik ukiulik Østersømi Nord Stream 1-imik 2-millu gassimik assartuinissamut ruujorersuarnik 2022-mi septembarimi qaartitsisimasutut pasissaavoq.

Svenskit aviisiisa ilaat Expressen tyskillu aviisiisa ilaat Süddeutsche Zeitung aamma Die Zeit aamma TV-kkut aallakaatitsivik ARD taama allapput.

Ukrainemiu tigusarineqartusanngorlugu eqqartuussivimmi nunani tamalaani ujagaalersutut Tysklandimi Karlsruhemi eqqartuussivimmi junimi aalajangiunneqarpoq. Tysklandimi naalagaaffiup unnerluussisussaatitaata suliami pasisaasut pingasut kinaassusersigaat, nutaarsiassaqartitsiviit allapput.

Pasisaasoq Volodymyr Zhuralov ilaquttanilu Polenimi illoqarfiit pingaarnersaata avatinnguani Warszawami najugaqarput.

Ujagaasorli Expressenimi paasissutissat malillugit naneriaannaajunnaarsimavoq.

Misissuineq Tysklandimi, Sverigemi Danmarkimilu ingerlanneqarsimavoq. Kisiannili svenskit danskillu pinerlittaalisitsisuisa misissuineq ukioq manna siusinnerusukkut unitsippaat.

Østersømi Nord Stream 2-mi Bornholmimi Dueoddenimiit 20 kilometerinik ungasitsigisumi qaaartitsisoqartoq 2022-mi septembarip 22-ani unnuakkut malugineqarpoq.

Nordstream 1-imi qaartitsisoqartoq nalunaaqutaq 19.03 malugineqarpoq. Gassimik assartuussissutini ruujorersuarni pingasuusuni putorsuit sisamat tamatuma kingorna nassaarineqarput.

Pasineqartut marluk Expressenimi paasissutissat malillugit aqqartartutut suliffeqarfimmik Ukrainemi ingerlataqartuupput.