Watsonip eqqartuussissuserisuisa video unnerluussusissutinut ilungersunarluinnartunut eqqunnginneraassutitut atorniaraat

Avatangiisinik illersuiniap Paul Watsonip eqqartuussissuserisui unnerluussissutigineqartut ilungersunarluinnartut tunngavissaqannginnerannut uppernarsaataasunik Eqqartuussisoqarfik Sermersuumi aqagu saqqummiussiniarput.

Eqqartuussissuserisut aappaa, Julie Stage ataasinngornermi paasissutissiivoq.

73-inik ukiulik, avatangiisinik illersuiniaq Nuummi juulip 21-anni Japanimit tigusarinneqqussutigineqartoq pissutigalugu tigusarineqarpoq. Avatangiisinik illersuiniaq Sullualukkut angalaniarluni Nuummi orsernerminni tigusarineqarpoq.

Allanut innarliisimannginnerartoq

Japanimiut arfanniat Sikuiuitsoq Kujallermi 2010-mi suliaqarneranni Watsonip akuliunnerata kingunerisaanik tigusarinneqqussuteqalerpoq.

Pisup kingorna newzealandimiu avatangiisinik illersuiniaq, Pete Bethune tigusarineqarpoq, Japanimilu eqqartuunneqarluni. Taanna pissutsini tamani Watsonimut unnerluussissutigineqartunut Japanimullu tunniunneqarnissaannut tunuliaqutaasunut eqqartuunneqarpoq.

Taannali pissutsini ilungersunarnerpaami, Japanimi ukiut 15-it tikillugit parnaarussaanermik kinguneqartartumi, tassa inummut allamut innarliisimanerarneqarnermini pinngitsuunerarpoq.

Pissullu taannarpiaq Paul Watsonip eqqartuussissuserisuisa danskiusut piviusumut tunngavissaqannginnerpaat.

Taamaammat taakku tamanna uppernarsarniarlugu eqqartuussivimmi sisamanngorpat saqqummiussaqarniarput.

Qaartartoq tippassaasartoq umiarsuarmut iginneqartoq

Video aallakaatitassiamit "Whale Wars"-imeersoq pineqarpoq, taanna Animal Planetikkut 2010-mi aggustimi- Bethunep Japanimi eqqartuussaaneranit qaammatip kingornani saqqummiunneqarpoq.

2010-mi februaarimi pisumi Bethunep gummibådimit qaartartoq tippassaataasartoq japanimiut arfanniat umiarsuaannut milorujuppaa. Watson nammineq umiatsiamiinngilaq, suleqataasimasutulli pasineqarluni.

Japanimi eqqartuussivimmi japanimiut arfanniat umiarsuaanni inuttaq ataaseq umiarsuup qaavaniissimasoq qaartartullu tippassaasartup imaanik eqqorneqarami kiinnamigut uutitersimavoq, Julie Stage paasissutissiivoq.

- Qaartartup tippassaasartup milorujunneqarneranit/eqquineranit videoliamik nassaarpugut.

- Videomi eqqartuussiviup tunngavittut atugaatulli umiarsuup "qaaniittoqanngitsoq" takuneqarsinnaavoq,

Bethune Japanimi ukiuni marlunni parnaarussassanngortinneqarnikuuvoq.

Paul Watson Nuummi pineqaatissinneqarsimasunut inissiisarfimmi tigummigallarneqaannassanersoq pillugu sisamanngornermi eqqartuussisoqassaaq. Aatsaat kingusinnerusukkut Japanimut tunniunneqassanersoq aalajangiiffigineqarumaarpoq.

Danmarkimi Inatsiseqarnermut ministereqarfiup Japanimut tunniussisoqassanersoq aalajangertussaavaa.