Assit: Kunngikkormiut tamakkerlutik Royal Runimi ullumi arpaqataasut

Kunngi Frederiup dronning Maryllu qitornai nukarliit pingasut, prinsesse Isabella, prinsesse Josephine aamma prins Vincent Royal Run Københavnimi ataasinngornermi ullorornerani aallartippaat.

Taakkua pingasuullutik one milemik isorartussuseqartoq tassa 1,609 kilometeriusoq arpappaat.

Taakkua politiit sikkilertunit isorartussuseq tamakkerlugu ingiaqatigineqartut, TV2-p toqqaannartumik aallakaatitsinerani takutinneqarpoq.

Taakkunannga pingasuusuni Prins Vincent siulliulluni apuuffissamut annguppoq, tulliulluni prinsesse Josephine malinnaavoq kiisalu prinsesse Isabella. 

TV2 naapertorlugu prins Vincentip minutsit tallimat sekundillu 56-it atorlugit apuuppoq.

Kunngi pingasoriarluni arpattoq

Prinsesse Josephinep one mile minutsit qulingiliuat missaanni aqqutigaa, prinsesse Isabellap minutsit qulit atorlugit arpakkaa.

Tamatuma pinnginnerani angutaat Kunngi Frederiup Ribemi isorartussutsip assinganik arpapportaaq. Tassani “ilaquttakka tamakkerlutik ullumi peqataaneri tanngassimaarutigaara” naluaarutigaa.

Kunngi Frederik Ribemut tikeraareerluni Horsensimukarpoq, tassani kilometerit tallimat arpassallugit. Naggasiutigalugit Københavnimi Frederiksbergimilu unnummut 10 kilometerit arpassavai.

Kunngissaq Christian Viborgimi aamma arpappoq, dronning Marylu Korsørimi kilometerit tallimat ataasinngornermi ullorornerani apappai.