Air Greenlandip LGBTQ+-p pisinnaatitaaffii ataqqivai: Assigiinngisitaarneq peqataatitsinerlu pingaartikkitsik oqariartuutigaat
Air Greenland meerartaarnermut atatillugu sulinngiffeqarsinnaatitaanermik nutaamik atuutitsilerpoq.
Pisinnaatitaaffiit eqqarsaatigalugit, meeqqap angajoqqaavi, tamarmik naligiilerput – marluullutik angutaagaluarpata, marluullutik arnaagaluarpata, imaluunniit angutaallutillu arnaagaluarpata.
- Maani sulisut, aaqqissuusineq nutaaq iluarigaat qularinngilara. Kisitsisaatigut malillugit amerlavallaanngitsut aaqqissuussineq nutaaq iluaqutigissavaat, Mads B. Christensen, Air Greenlandimi sulisoqarnermut pisortaq oqarpoq.
Pisinnaatitaaffinnik allanngortitsineq pivoq suleqatigiissitap, Air Greenlandip sulinermut atatillugu politikkiata allannguutissaanik ataatsimiissuteqartarnermini eqqaasarialinnik siunnersuuteqareersorlugu, nassuiaavoq.
Soorlu: Air Greenlandip nittartagaagut inniminniinerni angutaaneq arnaanerluunniit taamaallaat toqqagassaapput. Kisianni, Mads B. Christensen oqarpoq:
- Taakku arlaat toqqarsinnaanngikkaanni, allamik toqqagassaqanngilaq.
Suliffissatsialak
Toqqagassallu allanngortinneqarput, angalasup imminut qanoq taaneqarnissani nammineq toqqarsinnaanngormagu, soorlu suiaassuseqanngitsoq / imminut taasassaanngitsoq / Allatut.
Sulisut pisortaat (HR-chef) ilisimatitsivoq, suleqatigiissitaq Air Greenlandip sulinermut atatillugu politikkia qanimut misissoriarlugu suliffeqarfiup sulisuisa suleqatigiinnerunissaannut siunnersuutitsialannik saqqummiisimasoq. Suleqatigiissitarlu qaammammut ataasiarluni naapittarpoq, siunnersuutillu eqqartortariallit Air Greenlandimi ataatsimiititaliamit ataatsimiissutigineqartarput.
- Peqataatitsinerulersinnaagutta, Air Greenlandip suliffissatut pilerigineqarnerulernissaa nunarsuarmioqatitsinnut anngussinnaagipput, eqqarsarpunga.
Tulluusimaartoq
Assigiinngisitaartuunermik akuersineq peqataatitsisinnaanerlu suliffeqarfimmi piunerat nutaamik aaqqissuussinermikkut oqariartuutigigitsik Mads B. Christensenip oqaatigaa:
- Misigisaq nuanneqaaq tulluusimaarnarlunilu – uanga tulluusimaaqaanga, Mads B. Christensen oqarpoq.
Air Greenland Facebookiminni allaaserisaminni oqarput, suliffeqarfik suliniutiminnik politikkiminnillu pitsanngorsaajuartuusoq, Air Greenlandilu taamaliornermigut peqataatitsinerulissasoq, suliffeqarfittullu pilerigineqarnerulissasoq, sulisooreersunut sulilersussanullu iluaqutaasumik.