Assigiinngisitsisoqarsimanera puigorneqanngitsoq

Atorunnaarsinneqarneraniit ukiut 20-t qaangiussimalereeraluartut assigiinngisinneqarnerminnik misigisaqarsimasut suli puiunngilaat.

- Taanna nuannarinngisaannarparput, inuttut nakkarsagaanertut uanga aamma nuliama misigisimavarput, ilinniartitsisoq soraarneq, Samuel Olsen taama oqarpoq

Sumi inunngorsimaneq tunngavigalugu atugassarititaasut 1964-imi atulersinneqarpoq, tassanilu nunami allami pingaartumik Danmarkimi inunngorsimasut nunatsinni inunngorsimasunit atugassarissaarnerutinneqarput.

Tassani aningaasarsiaqarneruneq, sulinngiffeqarfeqarneruneq, inigisamut atisanullu tapisiaqarneruneq ilaatigut ilaapput.

Sumi inunngorsimaneq akissarsianut apeqqutaalluinnartoq

Samuel Olsen Danmarkimi ilinniartitsisutut ilinniarsimavoq kingornalu ukiut pingasut tappavani suleqqaariarluni, 1966-imi Qaqortup atuarfiani sulilerpoq, tassanili kalaallinut atugassarititaasut pitsaanngillat.

- Nunatsinni ilinniarsimasugut perorsimasugullu, atuarsimallutalu kalaallisut oqalussinnaavugut, kalaallit kulturiat nalunagu taavalu sulinitsinni tunngavissagut pitsaanerujussuullutik qallunaaniit tikisitanit taamalu pineqarneq taamatut nuannarinngilluinnaqqissaarpagut.

Kinguneqangaatsiartoq

Jakob Janussenip saammaateqatigiinnermut isumalioqatigiissitamut misissueqqissaarnera naapertorlugu, sumi inunngorsimavik tunngavigalugu atugassarititaasut kalaallit nunanut allanut unammillerusussuseqarnissaannut piginnaanngorsaatissaattut siunertaqarluni pilersinneqarpoq.

Sulisunillu nunanit allaneersunit nunatsinnut suliartorusutsitsilernissamut aamma atorneqarluni tamannalu aamma iluatsilluarpoq.

Taamaakkaluartorli assigiinngisitsiffigineqarsimasut misigisimasartik puiorsimanngilaat.

Tamannalu Samuel Olsenip isumaqataaffigaa.

- Taamatut periuseq taanna malillugu pineqarnerput nuannarinngilluinnaqqissaarpara, inuttut appasinnerusutut imminut misigalunga, taanna nuannarinngisaannarpara, aammalu qularnanngitsumik inuunerma naggataanut puiornaviarnagu.

Samuel Olsen 2001-imi soraarninngorpoq.