Asii: Kommuneqarfik Sermersuumi ernumasoqanngilaq

Kommuneqarfik Sermersuup KANUKOKA-mit Ilaasortaajunnaarnissa KANUKOKA-mi ernumassutigineqartoq, Kommuneqarfik Sermersuumi ernumasoqanngilaq. Tamanna KANUKOKA-mut ajornartorsiutaaneruvoq, Kommuneqarfik Sermersuup borgmesteria akissuteqarluni tusagassiuutinut nalunaarummini taama allappoq.

Aamma atuaruk palle-sermersuumut-ilaasortaaginnaritsi

-  Kommuneqarfik Sermersuumi  innuttaasut KANUKOKA-mit  ernumassutigineqarnerat tusarlugu nuannerpoq. Tamanna siusinnerusukkut pisimagaluarpat pissutsinut taamatut ittunut pisimassanngikkaluarpugut. Kisianni eqqortoq tassaavoq, 2013-imi borgmesterit pingasuullutik arajutsisilluta ataatsimoortumik tapiissutit agguataarneqarnissaat pillugit Naalakkersuisunut saaffiginnimmata suleqatigiinnermit peersitaavugut, Kommuneqarfik Sermersuumi borgmesteri, Asii Chemnitz Narup allappoq, tamannalu ilutigalugu kommunip ilaasortanngoqqinnginnissaa erseqqissaatigalugu.

Kommuneqarfik Sermersooq ilaasortaajunnaarniarluni nalunaarmalli KANUKOKA-mi aaqqissuussaaneq allanngortillugu isumaqatigiilluni ataatsimut aalajangiisoqartalerpat ilaasortaajunnaarnissaq kommunimi eqqarsaatigeqqinneqassasoq KANUKOKA-mut nalunaarutigineqartarsimavoq.

- Soqutigisarinngisatsinnik aalajangernerit pinngitsaaliissummik tapersersortussanngorlugit inisseqqinnianngilagut. Tamanna KANUKOKA-mut arlaleriaqaluta oqaatigisarparput, kisianni tusarneqarsimagunanngilagut, borgmesteri oqarpoq imalu nangilluni.

- Eqqortoq unaagunarpoq, Palle Jerimiassen ukiut tamaasa KANUKOKA-mut akiliutigisartakkavut, 4,2 millioner koruunit innuttaasutta ajunngitsumik inuunissaaninngarnit ernumassutiginerunarai, Asii Chemnitz Narup oqarpoq.

Aamma atuaruk Nalimmassaaneq kommunip aningaasaqarniarnerani artornarsinnaavoq

Aamma atuaruk Palle Jerimiassen: Iluatsinngitsuugaqarpugut

Aamma atuaruk Kommuninut tapiissutit agguaanneqarput