Kommuninut tapiissutit agguaanneqarput

Immikkut kommuuninut tapiissuutit 2016-moortut, 1,3 milliardit sinneqalaartut, Nunatta kommuniinut sisamaasunut agguaassassatut isumaqatigiinniutigineqaqqammerput.

Kommunit kattuffiannit, KANUKOKA-mit aningaasat taakku isumalluarfigineqarput sumullu atornissaat ilisimaneqareerluni.

- Tamaattumik una immikkut tapissutinut siumaqatigiissut isumalluarnarpoq kommunillu aningaasaqarnerisa siumut aallaqqinnissaannut tamassuma aqqutissiuunneqalersinnaanerannut isumalluarnarluni, Kommunit kattuffianni, KANUKOKA-mi siulittaasoq, Palle Jerimiassen (S) taama oqarpoq.

Kommunit sisamaasut aningaasat aappaagu agguagassaat, 1,3 milliarder koruuniupput. Taakkulu agguaanneqarneranni Qaasuistsup Kommunia amerlanernik aningaasannassalluni, 478 millioner koruuninik pissarsissaaq, Qeqqata Kommuni 248 millioner koruuninik pissarsisoq. Kommune Kujalleq 215 millioner koruuninik pissarsitinneqartoq, Kommuneqarfik Sermersooq 376 millioner koruuninik pissarsitinneqassaaq.

Aamma atuaruk Namminersorlutik Oqartussat KANUKOKA-lu isumaqatigiissuteqarput

Kommunit ataasiakkaat aningaasat pissarsiassaat qanoq amerlatigissanersut immikkut naatsorsueriaaseq atorlugu agguaanneqarsimasut, Aningaasaqarnermut Naalakkersuisoq, Andreas Uldum oqarpoq.

- Agguaariaaseq ukiuni siullerni atorneqartartumut assigusoq maanna atorneqarpoq. Assersuutigalugu innarluutilinnut aningaasartuutinut tunngasuteqartut, VSP-mut, tassa immikkut ilinniartitsinermut tunngassuteqartunut taamatullu PPR-imut tunngasut, tassa perorsaanikkut tarnikkullu siunnersuisarnerit eqqarsaatigalugit agguaassisoqarluni. Tamakkulu eqqarsaatigalugu kisitsisit kommunimiit kommunimut assigiinngitsuupput, Aningaasaqarnermut Naalakkersuisoq oqarpoq.

Kommunit ukiuni kingullerni aningaasatigut ingerlanerlussimanerat eqqarsaatigalugu, kommuninut tapiissutit ukiuni tulliuttuni pingasuni, tassa 2016-miit 2019 tikillugu amerlassusaat allanngortinneqarpiassanngitsoq isumaqatigiissutaavoq.

Aamma atuaruk Andreas Uldum: Kommuneqarfik Sermersooq kisimi sinnerlugu naalakkersuisuunngilanga

- Tamassumalu nutaartaraa, ukiunut tulliuttunut arlalinnut isumaqatigiissutip sanaajunerani, kommunit siumut isigisumik ukiunut arlalinnut pilersaarusiorasinnaanerannut periarfissiimmat, Palle Jerimiassen (S) oqarpoq.

Kommunit aningaasaqarnerannut tunngasut allat annertuut aalajangiunneqannginneranni, kommuninut immikkut aningaasaliissutaasut ukiunut tulliuttunut pingasunut isumaqatigiinniutigineqarsimaneri aaqqiissutaaginnarallartoq, Aningaasaqarnermut Naalakkersuisoq oqarpoq.

- Ukioq 2019-mi immikkut tapiissutit pillugit aamma kommunit akornanni aningaasatigut nalimmassaanermut tunngassuteqartunik Inatsisartuni aalajangiisoqarnissaat Naalakkersuisunit sulissutigilersaarparput, Aningaasaqarnermut Naalakkersuisoq, Andreas Uldum oqarpoq.

Aamma atuaruk Palle Jerimiassen: Iluatsinngitsuugaqarpugut

Kommuninut tapiissutit ukiunut tulliuttunut pingasunut amerlassusaasa assigiinnerunissaannik isumaqatigiissusiornermi, kommunit ukiuni tulliuttuni pingasuni aningaasaqarnermikkut pilersaarusiornerat oqinnerulertussaassasoq, Palle Jerimiassen (S) oqarpoq imalu nangilluni.

- Taamaalilluni kommunit ingerlanneqarnerinut tapiissutit oqilisaataasussaapput aamma tamassuma saniatigut maanna isumaqatigiinniutigaagut oqartussat sanaartugaasa kommuninut tunniunneqarnissaannut tunngasut. Taamaaliornermi kommunit aningaasartuutaannaanngitsunik aammali isertitassanik nutaanik angusaqartarnissaat siunertaalluni, Kommunit kattuffianni, KANUKOKA-mi siulittaasoq, Palle Jerimiassen (S) taama oqarpoq.

Kommuninut tapiissutit 2014-mi 1. milliardit sinneqalaaginnartut ukioq mannamut 1 milliarder 295 tusindit missarluinnaaniipput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl