Nalimmassaaneq kommunip aningaasaqarniarnerani artornarsinnaavoq

Kommuneqarfik Sermersuup nalimmassaanermut akilertagaasa qaavatigut 45 millioner koruuninik ukioq kingulleq akiliisussanngortinneqarpoq.

Kukkunersiuisartullu BDO-p siunnersuutaanni marluusuni maanna saqqummersumi, Kommuneqarfik Sermersooq 70 millioner koruuninik imaluunniit 100 millioner koruuninik akiliisussanngortinneqarnissasoq siunnersuutigineqarpoq.

Siunnersuullu akuerineqassappat Kommuneqarfik Sermersuup kommuninut allanut akiligassai katillugit 344 millioner koruunit qaangilaanngippagit 367 millioner koruunit qaangilaassavai.

Nalimmassaanermilu kommunit sinneri pingasut aningaasanik pissarsisussatut inissisimapput. 

Politikerit, KANUKOKA, Namminersorlutik Oqartussanilu atorfillit pisortat suliassaqarfii pillugit ataatsimiinneranni kommuninut nalimmassaanissamut tunngaviusut ullumi saqqummiunneqarmata politikkimik sulialinnit soqutigineqartorujussuuvoq.

Aningaasaqarnermut naalakkersuisup, Andreas Uldumip allaqqitassiaq pillugu siullermik naalakkersuisullu, tullissaanilu borgmesterillu sisamat ataatsimeeqatigisussaavai, suliarlu suli naammassinngimmat oqaaseqarumanani.

Aamma atuaruk Kommunit pillugit ataatsimiinneq sisamanngorpat aallartissaaq

- Naalakkersuisut suli oqaluuserinngillat. Tigoqqammivara, taamaammat annerusumik oqaaseqarfigisinnaanngilara, aamma aaliangiisoqarnikuunngilaq. Kisianni aamma pingaarnertut, tassunga tunngatillugu kommunit aqagu oqaloqatigineqartussaapput. Taakkua aamma tusaaneqarnissaat pingaaruteqarluinnarpoq, taamaammat annerusumik oqaasissaqanngilanga, Andreas Uldum taama oqarpoq.

Andreas Uldumip inatsisartuni illua tungiliuttutut inissisimanermini, kommuninut ukioq kingulleq nalimmassaasoqarnerani, Kommuneqarfik Sermersooq 45 millioner koruuninik akiliisussanngortinneqarmat akerliuffiginikuugaluarpaa.

Kommuneqarfik Sermersoorlu ullumi illersussaneraa aamma oqaaseqarfigiumanngilaa.

KNR-illi tusarfii malillugit allaqqitassiap itigartinneqarnissaa ilimagineqarpoq.