Palle Sermersuumut: Ilaasortaaginnaritsi
Taamaattumik taanna isumaqarpoq, Kommuneqarfik Sermersuup ilaasortaajunnaarnissaminik pilersaarutsit eqqarsaatigeqqittariaqaraat.
- Kommunit pingasuusut KANUKOKA-llu taama allagaqarnerminni, Kommuneqarfik Sermersooq eqqarsaqqeqqulaarppaa, ilaasortaajunnaarnissamik aalajangernertik nalilersorluaqqullugu. Tassami ataatsimoornerup iluaniikkaanni iluaqutissat arlaqarmata avissaaqqanermiit.
KANUKOKA-p siulittaasua, Palle Jerimiassen KNR-imut taama oqarpoq.
Sermersooq 117 mio. koruuninik akileerusunngilaq
2014-imi aggustiugaa, taamani Naalakkersuisuusut Vittus Qujaukitsoq siuttuliullugu, taanna aningaasaqarnermut taamani naalakkersuisuusoq, aalajangiipput Kommuneqarfik Sermersooq kommunit nalimmassarneqarnerannut, 2015-imut atuuttussamik 117 millioner koruuninik akiliissasut.
Naalakkersuisut taama aalajangernerannit qaammat ataaseq qaangiutiinnartoq, tassa septembarip 24-anni, Kommuneqarfik Sermersooq aalajangerpoq, KANUKOKA-miit ilaasortaajunnaassallutik tunngavilersuutigalugulu tassa ilaasortaajunnaarnerminni annaasaqarsinnaannginnamik.
Sermersuup annasassai amerliinnassapput
Taamali aalajangerneq naammanngitsoq, kommunit kattuffiata siulittaasua tusagassiuutinut nalunaarummini allappoq oqarluni, ilaasortaajunnaarneq tassaannaanngimmat, peqatigiiffimmut ilaasortaajunnaarneq inuiaqatigiinnili suliassaqarfinni annertuuni pingaarutilinnilu kommunimi innuttaasut sinnerlugit toqqaannartumik sunniuteqarnissamut immunut periarfissaarutitsinermik tamanna kinguneqartoq.
Suut periarfissat tassani pineqarnersut, Palle Jerimiassen ima nassuiaavoq.
- Tassa Sermersuumi sulisunut tunngasut isumaqatigiinniutaasinnaajunnaassapput. Taamatullu kommunit aningaasaqarnerannut sinaakkutissat isumaqatigiinniarfigineqarnerannut Sermersooq imminut mattutissaaq. Taamaattumik kommunip annaasassai ilaasortaanerminngaanniit annertupput, taamaattumik kommunip eqqarsarluarnissaa kissaatigaarput.
KANUKOKA-p siulittaasua, Palle Jerimiassen taama oqarpoq.
Kommuneqarfik Sermersuup borgmesteriata, Asii Chemnitz Narup allakkat ammasut pillugit kommunimi atorfillit aatsaat oqaloqatigereerunigit pisoq oqaaseqarfiginiarlugu, KNR-imut oqarpoq.
