Asii: Danmark Nunarpullu avatangiisit pillugit iliuuseqanngippallaarput
![Asii Chemnitz Narup Asii Chemnitz Narup](/sites/default/files/styles/image_934x467/public/article_images/img_4017.jpg?itok=kG_c5PGX)
Allaaserisamini Asii Chemnitz Narupip danskit kalaallillu naalakkersuisui avatangiisit illersornissaannut takorluugaqannginnerarpai.
- Danmarki nunarsuarmi nunat pisuujunerpaat ilagaat. Aamma aningaasarliornerluunniit suli malunnaraluarpat. Avataaniit malinnaavigalugu eqqarsarnaqaaq danskit naalakkersuisuisa avatangiisit illersornissaat pillugu qanoq takorluugaqanngitsigisut, borgmesteri ilaatigut allappoq.
Asii Chemnitz Narup isumaqarpoq Kalaallit Nunaata Danmarkillu marluullutik iluaqutigissagaluaraat, avatangiisit illersorneqarnissaat pillugu anguniagaqalersuugunik.
Aamma atuaruk PAN AM Nuummi unammersuarnissat Asiip nuannaarutigai
Borgmesteri naapertorlugu Kalaallit Nunaanni Danmarkimilu kommunit avatangiisit pillugit iliuuseqartupilussuupput. Assersuutitut taavaa Nuummi illoqarfiit pingaarnersaattut iliuusissatut aaqqissuinera, soorlu biilinut innaallagiatortunut periarfissagissaartitsinerit, aamma qulliit silamiittut LED-teknologimut atasunik taarsersorneqarnerat. Nunali tamakkerlugu politikeriusunit takorluukkatigut tapersersorneqarnikkullu amigaateqarpoq.
- Avatangiisit illersorneqarnissaannut periarfissarpassuaqaraluarpoq: atoqqiinerit, isumalluutinik atuinikinneruneq, nukissiuutitigut allannguinerit ilaallu ilanngullugit. Annikittukkuutaartumik pitsanngorsaanerit annertuumik sunniuteqarsinnaanerat, nutaaliornerit, ileqqaarinerillu tamarmik inunnut avatangiisinullu iluanaarutaassasut Asii Chemnitz Narup taama allappoq.