Assi: Grønlands Håndbold Forbund

PAN AM Nuummi unammersuarnissat Asiip nuannaarutigai

2018-imi, juunip qaammataani, tassa ukiut marlussuit qaangiuppata, Amerikap nunavittaani assammik arsarluni unammersuarnerit Nuummi pissapput. Amerikap nunavittaani assammik arsartartut kattuffia arfininngormat Argentinami ataatsimeersuarmat tamanna aalajangerneqarpoq.

 

Aaqqissuussaq inersimasunut timersornikkut Nunatta oqaluttuarisaanerani pisimasuni annerpaassaaq, Kommuneqarfik Sermersuumilu borgmesterip nutaarsiassaq nuannaarutigaa. 

- Aatsaat taama nutaarsiassamik nuannaajallannartigisumik, ilami nunat tamalaat akornanni nunarput maluginiarneqarsimasoq paasillugu assorujussuaq nuannaarpunga. Nunatsinni assammik arsartartut kattuffiat pilluaqqorusuppara taama kusarnartigisumik sulinuteqareerluni inerniliuussisinnaammat, Kommuneqarfik Sermersuumi borgmesteri Asii Chemnitz Narup KNR-imut oqarpoq.

Aammaarlunilu Nuuk maanna timersornermi aaqqissuussamik imaannaanngitsumik aaqqissuussinialissaaq, martsillu qaammataani Arctic Winter Gamesertoqarnerani misilittakkat atorfissaqalerlutillu erlinnarsipput.
  - Ilaana, misilittagaqarfigisagut taakku atorluarumaarpagut. Oqaatigerusupparalu misilittakkani pingaarnerpaasoraara siunnissami ataatsimi ataatsimoorussilluni angusassaq anguneqarsinnaammat, soorlu timersornikkut kattuffiit, timersoqatigiit kattuffiat, uagut, naatsorsuutigaaralu aamma Namminersorlutik Oqartussat taamatulli qanitsigisumik suleqatigiumaarlugit. Minnerunngitsumik aamma Nuup illoqarfiani innuttaasut. Taamaattumik misilittakkat taakku atorluarumaarpagut, borgmesteri oqarpoq nangillunilu:  

- Suleqataarusuttorujussuuvugut. Ilami assammik arsartartuvut unammiartoraangata maanngaanniit ungasianinngganniit malinnaallutalu nuannaaqataasarpugut. Qanorli massakkut unammisitsisussaalluni illoqarfitsinni qanoq iliuuserisinnaasagut tamaasa atorluarlugit suleqataassaagut, ilaana, Asii Chemnitz Narup oqarpoq.

Nunarpullu nunanit allanit malugineqarumaarnera qularisassaanngilaq.

- Maluginiartaroara unammersuarnerit, pissartanngorniunnerit taakkua, assorujussuaq tusagassiorfitsigut malinnaavigineqartarmata, taamaammat taanna eqqarsaatigalugu nunatta, Nuullu, nittarsaalluarnissa periarfissatsialak matumuuna takusinnaasorivara. Atorluarumaarparput aamma, Kommuneqarfik Sermersuup borgmesteria Asii Chemnitz Narup oqarpoq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat