Asiaq nittartakkatigut sakkortuumik saassunneqartoq

Asiaq Greenland Survey tassa avatangiisinik siumut misissuinermik ilisimatusarnermillu suliaqartartoq marsip qiteqqunnerani ransomwaremik taaneqartartumik nittartakkatigut saassunneqarpoq.

Nunamik assiliornermut aqutsisoqarfik tusagassiuutinut nalunaarummi allappoq.

- Nittartakkatigut pinerlunnianit sakkortuumik saassunneqarpugut, qujanartumilli Asiaq-mi paasissutissaatigut sillimaniarneq eqqarsaatigalugu kopeerneqarsimammata, taamaalillutik pinerlunniat saassussigaluarnerat akiliinermik kinguneqanngitsoortinneqarpoq, Asiap pisortaa, Mette Skarregaard oqarpoq.

Saassussisoqarnerata kingunerisaanik Asiap nalinginnaasumik ingerlaleqqinnissaanut sapaatit akunnialui ingerlaqqaartariaqarput. Tamanna Asiap silassamut nittartagaanut, innuttaasorpassuarnit angalaarniartunit atorneqartartumut aamma tunngavoq.

- Pisoq Asiaq-mit pimooruttorujussuuarput, saassussinermillu kingunerluutit iliuuseqarfigalutigit, soorluttaaq aamma qarasaasiaqarnitsinni sillimaniarnermut attuumassusillit annertusarigut, Mette Skarregaard oqarpoq.

Nittartakkatigut saassussinerup atuisartunut kiffartuussanullu sunniutaasut Asiap ajuusaarutigai.

Nunatsinnut saassussisoqarnissaa ilimanaateqarluinnartoq

Ransomwaremik taaneqartartumik saassussisoqaraangat saassussinermi pinerluttut fiilinik qarasaasianiittunik krypteeriillutik ersiunnaarsitsisarput, ilaatigullu fiilit qarasaasianiittut annaaneqartarlutik.

Taamaalioreerunillu pinerluttut fiilinik ammaanissamut amerlanertigut aningaasanik akileeqqusisarput. 

Illersornissaqarfiup nittartakkakkut pisunik misissueqqissaartarfiata Center for Cybersikkerhedip (CFCS-ip) nunatsinni aarlerinartunik naliliinini sapaatip akunnerani siusinnerusumi nutarterpaa.

Nunatsinni nittartakkatigut saassussisoqarnissaanut aarlerinartoq annertoorujussuuvoq, ransomware-imillu saassussisoqarnissaa aarlerinarnerulluni.