Arnat ulluat Taseralimmi nerersuaqatigiinnermik malunnartinneqassasoq
Nunarsuarmi Arnat Ulluat immikkut nalliuttorsiutigineqartarpoq, ullorlu Taseralimmi Sisimiuni Arnat Ulluat komite suleqatigalugu malunnartinneqassaaq. Taseralimmi ilaatigut oqalugiartoqarlunilu arnatummik nersornaasiilluni unnussiuaartoqassaaq.
Nunani tamalaani arnat ulluat 1975-mit atulersinneqartoq Naalagaaffiit peqatigiinnit akuerisaavoq.
Nalliussisarnerlu Kinami, Cubami, Makedoniami, Ugandami Vietnamimilu nalliussineqartarpoq.
Taseralimmi pisortaq, Arnajaraq Støvlbæk pisussat pillugit oqaloqatigaarput:
- Tassa ullormi tassani Arnat Ulluat komité maani Sisimiuni suleqatigalugu unnukkut nerersuartitsissaagut Taseralimmi. Taavalu nerersuarnerup ingerlanerani oqalugiartut, aliikkusersuisut assigiinngitsullu pissallutik, aammalu Sisimiuni arnatsialak taagasarput Arnatuk nersornaaserneqassaaq aamma unnuup ingerlanerani. Taavalu kingusinnerusukkut qitittoqassallu arnaq DJ-eq DJ-ralugu,
Sisimiuni Taseralimmi pisortaq, Arnajaraq Støvlbæk taama oqarpoq.
Taanna isumaqarpoq Taseralimmi ukiut tamaasa marsip arfineq-pingajuani aqissuussisoqartarnera Sisimiuni arnat akornanni ataqatigiissitsisartoq.
- Marsip ulluisa arfineq-pingajuata malunnartinneqarnissaa uanga nammineq pingaartippara, naligiissitaanermut tunngatillugu suli angusassarpassuaqaratta. Pisinnaatitaaffippassuaqarpoq ulluinnarsiutinngortinnissaannut ilungersuutigisariaqakkatsinnik, Arnajaraq Støvlbæk oqarpoq. Taassumalu ilanngullugu oqaatigaa Taseralimmi unnugu aaqqissuussinermut angutit aamma tikilluaqqusaasut.
- Peqataakutsoorsinnaapput piumagunik.
