Assammik arsarneq Arnat silarsuarmi pissartanngorniunnernut suli anngussinnaasut
Nunanut allanut unammisartut arnartaat amerikap nunavittaani pissartanngorniunnerit aqqutigalugit silarsuarmi pissartanngorniunnernut anngunnissaminnut periarfissaqaqqilerput.
Canadamiummi amerikap nunavittaani pissartanngorniunnernut peqataanissaminnut pisinnaajunnaarlutik nalunaarmata, nunavissuup avannarpasissuaniittumik allamik peqataasoqartariaqalerpoq.
- Tassanilu uagut unammersuarneq kingullermi NORCA-mi Puerto Rico qaammat kingulleq pisumi sisamaattut inissinnitsinnut atatillugu inissap taassuma uagutsinnut tunniunneqarnissaanut qaaqqusissut tiguarput, Nunanut allanut unammisartut sungiusaasuat, Johannes Groth oqarpoq.
Arnanut timersortartunut siuarsaasinnaasoq
NORCA-mut peqataanermit amerikap nunavittaani pissartanngorniunnernut tassa anngutinngitsooraluarput. Iligiit tassani sisamaattut kingullertullu inissipput.
Sungiusaasulli peqataanissamut qaaqquneqarnertik nuannaarutigaa. Nunanummi allanut unammisartut nunani allani unamminernut peqataagunik misilittagaqarnerulissapput.
Peqataassappatalu arnanut timersortartunut tamanut siuarsaataanissaa, Johannes Grothip neriuutigaa.
- Timersornerup iluani Kalaallit Nunaanni arnat annikinnerusumik siornatigut isigineqartarsimanerata kingorna pitsaanerusumik sullinneqartarnerat takuleriartuaarparput. Aamma neriuutigivara arnat timersornerup tungaatigut sullinneqarnerat taamatut ingerlaannassasoq, aammalu siuariartornera taamatut ingerlaannassasoq, Johannes Groth oqarpoq.
Aningaasanik tapersersuisoqarnissaa pisariaqartoq
Pissartanngorniuteqataanissamulli angalanissaq akisussammat, maanna tapiisussarsiorput.
Akissaqarnissarlu apeqqutaammat peqataanissaq suli qulakkeerneqanngilaq.
Sungiusaasorli naapertorlugu Elite Sport Greenlandip tapersersuinissani neriorsuutigereerpaa, tamannalu isumallualersitsivoq.
- Piviusunngorsinnaanissaa maannakkut sapaatip akunnera kingullerminngaanniit upperineruvara. Kisianni suli inissivinneqanngilaq, kisianni maannakkut qanillattorneruvugut, arnat assammik arsarlutik nunanut allanut unammisartut sungiusaasuat, Johannes Groth taama oqarpoq.
