Arnaq ukiut sisamat qaammatillu arfinillit pineqaatissinneqarsimasunut inissiisarfimmiittussanngortinneqartoq
![](/sites/default/files/styles/image_934x467/public/article_images/64904575_2165613337062834_349189516998737920_n.jpg?itok=khkHSI67)
Arnap danskip 51-inik ukiullip Danmarkimit nunatsinnut kokainimit 209 grammimik anngiortumik eqqussineranut atatillugu Nuummi Eqqartuussisoqarfik Sermersuumit eqqartuussut Nunatta Eqqartuussisuuneqarfiata ippassaq aalajangersarpaa.
Eqqartuussut piumasaqaatitaqanngitsumik ukiuni sisamani qaammatinilu arfinilinni pineqaatissinneqarsimasunut inissiisarfimmiittussanngortitsineruvoq. Naak arnap pissutsit nassuerutigisimagaluarlugit erngertumillu pineqaatissinneqaraluarluni, pineqaatissinnikinnerulernissaminik neriuuteqarluni eqqartuussut Nunatta Eqqartuussisuuneqarfianut ingerlateqqitassanngortippaa.
Nunatta Eqqartuussisuuneqarfiatali eqqartuussut aalajangersarpaa, arnarlu tamatuma kingorna pineqaatissinneqarsimasunut inissiisarfimmukaanneqarpoq.
Kalaallit Nunaanni Politiit tusagassiuutinut nalunaarummi allapput.
- Ikiaroornartunik sakkortuunik nunatsinnut anngiortumik eqqussineq ilungersunarluinnartuuvoq. Eqqartuussutip anngiortumik eqqunneqartut annikikkaluartulluunniit piffissami sivisungaatsiartumi nammineersinnaajunnaarsitsinermik kinguneqartitsissutaasinnaanera takussuseraa, tassani allassimavoq.
- Kalaallit Nunaanni inuiaqatigiit mikisuummata ikiaroornartut sakkortuut innarliinerat inuiaqatigiinnut ajornartorsiutaangaatsiarsinnaapput. Taamaammat ikiaroornartunut sakkortuunut tunngatillugu suliat Danmarkimi aalajangiissutaasartunit sakkortunerusumik aalajangiiffigineqartarput, Kalaallit Nunaanni Politiit unnerluussisussaatitaasuat, Lars Petersen tusagassiuutinut nalunaarummi oqarpoq.
Arnaq Københavnimit Kangerlussuarmukartilluni ukioq manna maajip 25-ani tigusarineqarpoq. Taanna tikikkami akitsuuserisunit unitsinneqarpoq, tassanilu kokaini 209 grammi nassataaniittoq nassaarineqarpoq.