Arnaq 51-inik ukiulik kokainimik anngiortumik eqqussisimasutut erngertumik pineqaatissinneqartoq
Arnaq 51-inik ukiulik kokainimik 200 grammimik anngiortumik eqqusseriarsimasutut ukiuni sisamani ukiullu affaanilu pineqaatissinneqarsimasunut inissiisarfimmiittussanngortinneqarpoq.
Kalaallit Nunaanni Politiit ataasinngornermi ualikkut tusagassiuutinut nalunaarummi allapput.
Arnaq Danmarkimiit nunatsinnukartoq Kangerlussuup Mittarfiani akitsuuserisunit unitsinneqarpoq, politiinullu unnerluutiginittunut ingerlaannartumik tunniunneqarluni.
Arnap unnerluutigineqartup nassuerutigai, taannalu Eqqartuussisoqarfik Sermersuumi sapaatiummat sassartinneqarlunilu eqqartuunneqarpoq.
- Eqqartuussut pitsaalluinnarpoq, tassannga ikiaroornartunik sakkortuunik nunatsinnut anngiortumik eqqussuineq ilungersunarluinnartumik isigineqartoq takutinneqarpoq. Aammattaaq suliap taama sukkatigisumik aalajangiiffigineqarsinnaanera naammagisimaarnarluinnarpoq, Kalaallit Nunaanni Politiinit unnerluussisussaatitaasuuneq, Lars Petersen oqarpoq.
- Ikiaroornartut sakkortuut soorlu kokain nunatsinni iluanaarutigineqangaatsiarsinnaapput, taamammallu inuiaqatigiinnut tuniniarneqalinnginnissaa pillugu sapinngisaq tamaat iliuuseqarniartoqarpoq, unnerluussisussaatitaasoq itisiliivoq.
Taamaammallu eqqartuussut sakkortusoq, taanna paasissutissiivoq, kokainimi aqqusinermi tuniniarneqaraluaruni tamanna hunnoru tusindilinnik iluanaarutaassaaq, unnerluussisussaatitaasoq nassuiaavoq.
Arnaq suli tigummigallarneqarpoq, taannalu pineqaatissiissutissap aallartinneqarsinnaalernissaata tungaanut tigummigallarneqassalluni, poltiiit tusagassiuutinut nalunaarummi allapput.
