38-nik ukiulik ikiaroornartunik anngiortumik eqqusseriartutut erngertumik pineqaatissinneqartoq

Inummik erngertumik pineqaatissinneqartoqaqqippoq.

Tamatumuuna angut 38-nik ukiulik Danmarkimiit tikittoq Kangerlussuup mittarfiani akitsuuserisunit januaarip 16-iani unitsinneqarpoq. Angutip timaata scannerneqarnerani timaani ilaasussaanngitsunik toqqortaqartoq paasineqarpoq.

Hashi 500 grammi pineqartoq kingornatigut paasineqarpoq.

Kalaallit Nunaanni Politiit tusagassiuutinut nalunaarummi allapput.

Angut ikiaroornartumik anngiortumik eqqusseriartutut pasineqarpoq, taassuma tamanna nassuerutigaa.

Angut Eqqartuussisoqarfik Sermersuumi ullumi eqqartuunneqarpoq. Taannalu ikiaroornartumik anngiortumik eqqussisutut eqqartuunneqarluni ulluni 60-ini pineqaatissinneqarsimasunut inissiisarfimmiittussanngortinneqarpoq.

Angut ikiaroornartumik anngiortumik eqqussisutut siornatigut eqqartuunneqareernikuuvoq, taamaattumik piumasaqaatitaqanngitsumik tassa erngertumik atuuttussanngortinneqartumik pineqaatissinneqarsimasunut inissiisarfimmiittussanngortinneqarpoq.

Hashimik arsaarinninnerup saniatigut angut eqqartuussivimmi suliaqarnermut aningaasartuutinik akiliisussanngortinneqarpoq.

Pisup assinganik pisoqartaartoq

Inuit sisamat ikiaroornartumik nunatsinnut anngiortumik eqqusseriaraluartut siorna erngertumik pineqaatissinneqarput.

Angut 51-inik ukiulik nunatsinnut kokainimik 150 grammimi heroinimillu 5 grammimik anngiortumik eqqusseriartutut ukiuni sisamani qaammatinilu arfinilinni pineqaatissinneqarsimasunut inissiisarfimmiittussanngortinneqarpoq.

Tamatuma saniatigut arnaq 34-nik ukiulik hashimik 1 kiilu 455 grammimik eqqusseriaraluarluni tigusarineqarpoq, taanna qaammatinik tallimanik erngertumik pineqaatissinneqarpoq.

Erngertumik pineqaatissiineq tassaavoq pinerluuteqarnerup peqqammernerata kingunitsianngua eqqartuussuteqarneq. Suliap erseqqissisinneqareersimanissaa pasineqartullu nassuerlunilu eqqartuussummik akuersinissaa tamatumani piumasaqaataavoq.