Arnaq toqumik kinguneqartumik persuttaasimasutut eqqartuunneqartoq
Arnaq aappani savimmik sakiaatigut kapillugu toqumik kinguneqartumik persuttaasimasutut eqqartuunneqarpoq.
Angut Nuummi Nuussuarmi 2017-imi septembarip sisamaani kapineqarpoq. Tassani 26-nik ukiulik aappanilu nangikkiarsimallutik ullaakkut festerput.
Politiit naapertorlugit taakku marluk oqqatilersimapput perulluliulerlutillu tamatumalu kingorna arnap aappani sakiaatigut kapivaa, angullu aaverluni toquvoq.
AAMMA ATUARUK Arnaq savissuaq atorlugu toqutsisutut unnerluutigineqartoq
Unnerluussisussaatitaasup arnaq toqutsisimasutut unnerluutigaa, arnalli illersuisuiata toqumik kinguneqartumik persuttaasimasutut pineqaatissiinissaq piumasaraa.
Tassalu arnaq toqumik kinguneqartumik persuttaasimasutut piffissami killiligaanngitsumi tarnimikkut nappaatilinnut Danmarkimi napparsimmavimmiittussanngorlugu Nunatta Eqqartuussisuuneqarfianit pineqaatissinneqarpoq.
Unnerluussisussaatitaasunit Nanna Werther eqqartuussut pillugu ima oqaaseqarpoq.
- Eqqartuussiviup suliaq toqutsisoqarsimasutut imaluunniit toqumik kinguneqartumik persuttaasoqarsimasutut nalilerpaguluunniit eqqartuussiviup inissiisarfimmiittussatut pineqaatissiisoqarnissaa pillugu unnerluussisussaatitaasut isumaqatigimmagit iluaraara, Nanna Werther allappoq.
Arnaq 26-nik ukiulik 2017-imili septembarimi tigusaammalli tigummigallarneqarpoq.
AAMMA ATUARUK Nuummi arnaq toqutsisimasutut tigusarineqartoq
