Arnaq savissuaq atorlugu toqutsisutut unnerluutigineqartoq
Siorna septembarip qaammataani ataasinngornermi ullaakkut Nuup ilaanut Nuussuarmut angut ikilersimasoq ikiortissarsiorlugu arnaq ambulancenut sianerpoq. Ambulancelli sumiiffimmut apuukkamik angut toqoreersimasoq paasivaat.
Eqqartuussivimmi suliami unnerluussut naapertorlugu angut sakissami saamiatungaatigut arnamit kapineqarpoq, tamannalu angutip erngerluni toqussutigaa.
Toqutsinermik kinguneqartumik saassussineq septembarip 4-iaanni, 2017-imi ataasinngornerup unnuaani nalunaaqutaq 01.25-p 02.35-llu akornanni pisimassangatinneqarpoq. Arnaq sumiiffimmut ikiortissarsioreernermi kingorna ullaakkut nalunaaqutaq 07.50-ip missaani tigusarineqarpoq.
AAMMA ATUARUK Nuummi arnaq toqutsisimasutut tigusarineqartoq
Arnap Danmarkimi tarnikkut napparsimasunut napparsimmavimmi killiligaanngitsumik tigummineqartussanngortinneqarnissaa unnerluussisussaatitaasut piumasaraat.
Arnaq unnerluutigineqartoq Aarhusimi tarnimut tunngasunik napparsimmavissuarmi eqqartuussivimmi suliassanut immikkoortortaqarfiani, Risskovimi ullumikkut tigummigallarneqarpoq.
Arnamut unnerluutigineqartumut eqqartuussivimmi suliaq, Sermersuup Eqqartuussiviani novembarip 27-ani aallartinneqassaaq.
