Arnaq aalisartoq: - Aalisarneq qilattaanermit nuannarineruara
Nunatsinni arnat aalisarnermik inuussutissarsiuteqartut amerliartuinnarput. Tamanna Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup nalunaarusiaani sapaatip akunnerata siuliani saqqummiunneqartumi takutinneqarpoq.
Kimmernaq Mathæussen Nuummeersoq, aamma Rita Inûsugtok Ikerasaarsummeersoq taakku ilagaat. Taakku meeraanerminniilli aalisarneq soqutigisaraat:
- Ataatama umiatsiaanik ilaajuaannarnera, aasat tamaasa arlaanut sumut aalisariartarnigut. Taavalu apriilimiit arnarlunniarneq aallartikkaangat nuannarisara tassa aallartittarpoq. Apriili qilanaarinerpaajuaannaavippara, inuussutissarsiutigalugu aalisartoq Kimmernaq Mathæussen oqarpoq.
Rita Inûsugtup aalisarneq aamma qaatuussaraa:
- Immaqa qaatuussaralugulu soqutigisareriarakku, qilattaanermiit nuannarineruara. Qilattaanikuunngivillunga nuannarineruara, Rita Inûsugtok oqarpoq.
Aalisarnerli soqutiginerugaat
Rita Inûsugtok saarullinniarnissamut 2022-imi akuersissummik allagartaqalerpoq. Taanna ukiuunerani ukialerneranilu aalisarunnaarluni nunami sulisaraluarpoq.
- Massakkut ukioq kaajallallugu aalisarneq inuussutissarsiutigilernikuuara, naluara sooq kisianni soqutiginartikkakku taavalu immaqa pikkoriffiginerullugit taakkua aalisarnermut tunngasukujuit, taanna oqarpoq.
Arnat 28-t ullumikkut aalisartuusut ukiut qulit kingulliit ingerlaneranni 0,3 procentiusinnarlutik siorna 1,4 procentinut amerleriarput.
‘Naak ikinnerussuteqaraluarlutik, 2016-imiit amerleriangaatsiarput. Arnat aalisartut procentinngorlugu amerleriaataat, ukiunut qulinut matuma siornanut sanilliullugu 2025-mi tallimariaammik amerlipput’, naalakkersuisoqarfimmit nalunaarusiami allassimavoq.
Kimmernaq Mathæussen aamma sulisartooreerluni inuussutissarsiutigalugu aalisarsinnaanermut siorna aasakkut allagartaqalerpoq. Taassuma aalisarnermini kiffaanngissuseqarluni pissanganartumillu sulineq soqutiginerullugu oqaatigaa:
- Kiffaanngissuseq taavalu imminut unammillersinnaaneq, taavalu unammilligassat pinngortitami anguniagaqartarneq soorlu aalisariaraanni ullormut suna misigissanerlugu pissanganartarluni qanoq angusaqarnissaq. Pissanganartuunera uanga nuannarersuaarakku, taanna oqarpoq.
Soqutigisaq aallukkaanni imminullu tatigigaanni anguneqarsinnaasoq
Sinerissamilu arnat inuussutissarsiutigalugu aalisartunngornissaminnik takorluugaqartut, Rita Inûsugtup Kimmernaq Mathæussenillu ima siunnersorpaat:
- Imminut naalaaraanni taavalu imminut tatigigaanni taakku pikkoriffigut atortussaagatsigit arnaqatikka pikkoriffisi atortarniarsigit qilattaanginnarasi, Rita Inûsugtok illalaarluni oqarpoq.
Soqutigisarlu aallaavigalugu inuussutissarsiorusukkaanni tunuarsimaannginnissaq Kimmernaq Mathæussenip arnaqatiminut aalisartunngorusuttunut kaammattuutigaa:
- Soqutigisaq aallaavigalugu inuussutissarsiutigerusukkaanni tunuarsimaarnani ingerlarsuinnarluni angusassaq anguneqarsinnaavoq. Soorlu uanga ukiut sisamat utaqqeqqaarnikuuvunga inuussutissarsiutigalugu allagartartaarnissannut, taanna oqarpoq nangillunilu:
- Kisianni tunniutiinnarnanga ilinniaannarpakka. Soorlu ataataga ilaaffigisarpara sungiusarlunga. Soqutigisat sukataarluni angusassaapput, angugaannilu oqiliallannerujussuaq nammineersinnaanngornermi nuannersorujussuuvoq, Kimmernaq Mathæussen oqarpoq.
