Arnat aalisarnermik inuussutissarsiuteqartut amerliartuinnartut
Silarsuarmi angutinit aqunneqartumi arnat amerliallalaarput.
Tamanna Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup aalisarnermik suliaqarfimmi arnat pillugit nalunaarusiaani nutaami erserpoq.
Naallu arnat aalisarnermik inuussutissarsiuteqartut 2025-mi amerlavallaanngikkaluartut siuariartoqarsimasoq, nalunaarusiami inerniliunneqarpoq.
Arnat umiatsiaararsorlutik aalisartut akuersissummik piginnittut 2025-mi 28-upput, taamaalillutillu umiatsiaararsortunit tamanit arnat 1,4 procentiupput. Angutit umiatsiaararsorlutik aalisartut 1.957-iupput.
Arnat 28-t ullumikkut aalisartuusut ukiut qulit kingulliit ingerlaneranni 2016-mi 0,3 procentiusuniit siorna 1,4 procentinut amerleriarput.
‘Naak ikinnerussuteqaraluarlutik, 2016-imiit amerleriangaatsiarput. Arnat aalisartut procentinngorlugu qaffariaataat, ukiunut qulinut matuma siornanut sanilliullugu 2025-mi tallimariaammik qaffappoq.’
Uummannami amerlanersaasut
Arnat umiatsiaararsortut nalunaarsorneqarsimasut 2023-miit 2024-mut amerlanerpaapput, tassa nuna tamakkerlugu 13-iullutik, 2024-milu 26-ullutik.
Arnat amerlanersaat Uummannami nalunaarsorsimapput, tassanilu aalisartut arnat marloriaammik amerlisimapput, tassa arfinilinniit aqqaneq-marlunngorsimallutik. aammali Sisimiuni Maniitsumilu siuariartoqarsimasoq, nalunaarusiami kisitsisit inerniliuppaat.
Alloriarnerit siulliit
Naalakkersuisoqarfiup nalunaarusiaani aamma kilisaatini 24 meterit sinnerlugit takissuseqartuni arnat sulisartut sammineqarput.
Arnat kilisaatiniittut amerlassusaat patajaatsumik inissisimallutik 4 procentiusut, nalunaarusiami inerniliunneqarpoq.
‘Ataatsimut isigalugu aalisarnermut immikkoortortami suiaassutsit assigiinneruleriartornerat, ineriartornerulli arriinnera,- arnallu pingaartumik timi atorlugu aalisartut suli ikittuararsuusut - nalunaarusiami takuneqarsinnaavoq. Aalisakkatigut pigisavut inuiaqatigiinni ataatsimut pigisatut ingerlanneqassappata, arnat amerlanerusut aalisarsinnaalernissaat kiisalu immikkoortortami sutigut tamatigut peqataanissaat pisariaqarpoq', nalunaarutip naggataani allassimavoq.
Paasissutissanik pitsaanerusunik tunioraasoqartarnissaa kiisalu anguniagaqarfiunerusumik suliniuteqarfigineqarnissaa kiisalu aalisarnermi naligiissitsineq anguneqassappat maligassiuffiunissaa pisariaqartoq, nalunaarusiami allaaserineqarpoq. Sunik anguniagaqarluni suliniuteqartoqarnissaa oqaatigineqanngilaq.
