Aqutsiveqarfinni arlalinni saattuarniarneq unitsinneqarallalertoq

Aqutsiveqarfinni Narsaq-Qaqortumi, Nuuk-Paamiuni Sisimiunilu saattuarniarneq marlunngornerup unnuaaniit unitsinneqarallalerpoq.

Taamaammat saattuarniutit kingusinnerpaamik ataasinngorpat qaqinneqassapput, ullormilu tassani naggataamik aamma tunisisoqarsinnaassaaq.

Kalaallit Nunaanni Aalisarsinnaanermut Akuersissutinik Nakkutilliisoqarfik, KANUAANA, taama ilisimatitsivoq.

Ammaqqinnissaanut KNAPK isumasioqatigalugu ulluliisoqassasoq

Saattuarniarunnaarallartitsinerminni saattuartassat sapinngisamik tamakkerlugit pisarineqarnissaasa qulakkeernissaa tunngavigigitsik, KANUAANA KNR-imut allakkamini nassuiaavoq.

Tamanna saattuat qaleruaasa aqilileruttorfianni saattuarniarnerup unitsikkallarneratigut pissaaq, Signe Bork Hansen KANUAANA-meersoq allappoq.

Ukiaru saattuarniartoqaqqissinnaalissaaq, ukiarulu ammaqqinnissaanut KNAPK isumasioqatigalugu ulluliisoqassaaq, Signe Bork Hansen ilisimatitsivoq.