Aqqaluap soraarsitsinermut nassuiaataa ataqatigiinngissorineqartoq
Naatsorsueqqissaartarfimmi pisortaasimasup inuiaqatigiinnilu pissutsinik ilisimatuup, Birger Poppelip, Henrik Lethip Naatsorsueqqissaartarfiup siulersuisuinit ilaasortaajunnaarsinneqarnera tupigusuutigaa. Henrik Lethip kattuffimmi inissisimanerata Naalakkersuisunit tunngavilersuutigineqarnera pissusissamisuunngilaq, Birger Poppel taama oqarpoq.
Henrik Lethip Naatsorsueqqissaartarfiup siulersuisuini, naak ukiuni marlunni suli ilaasortaasussagaluarluni ilaasortaajunnaarsinneqarnera, Atuagagdliutini pingasunngormat allaaserineqarpoq.
Naalakkersuisullu Aqqaluaq B. Egedep sisamanngormat nassuiaatigaa Henrik Lethip ilaasortaajunnaarsinneqarneranut kattuffimmi inissisimanera pissutaasoq.
AAMMA ATUARUK Aqqaluaq B. Egede soraarsitsinini pillugu nassuiaavoq
Taamatullu nassuiaateqartoqarnera pissusissamisuunngilaq, Birger Poppel, inuiaqatigiinni pissutsinik ilisimatuutut Ilisimatusarfimmut attuumassuteqartoq siornatigullu Naatsorsueqqissaartarfimmi ukiuni 15-ini pisortaasimasoq taama oqarpoq.
- Taamatut tunngavilersuuteqartoqarnera marlunnik pissuteqartumik pitsaasorinngilara. Siullertut, Henrik Lethip kattuffimmut ilaasortaanera toqqarneqarneranut pissutaanngisaannarmat, Birger Poppel oqarpoq.
Henrik Lethimullu taartaasussap Tønnes Berthelsenip aamma kattuffimmi inissisimanera pissutigalugu nassuiaatigineqartoq uppernarpianngilaq. Tamannami Henrik Lethip ilaasortaajunnaarsinneqarneranut tunngavilersuutigineqarmat.
- Taamaammat inummik piumasaqaatinik assigiinngitsunik naammassinnittumik, inuussutissarsiornikkulli kattuffiit anginerit ilaanni, tassalu KNAPK-mi, atorfeqartumik ilaasortanngortitsisoqarnera ileqimisaarnartuuvoq, Birger Poppel oqarpoq.