Apummit iminngortoq nunatsinni imartanut kingunerlussinnaasoq

Issittoq pillugu Ilisimatusarfimmi, Aarhus Universitetimi, DTU-mi Asiami, Pinngortitaleriffimmi ClimateLabimilu ilisimatuut ukiuni 13-ini sivisussusilimmik misissugassanut suleqatigiipput.
oktobarip 16-at 2017 10:11

Tunup avannaarsuani kangerlummi Young Sundimi uuttortaasoqarpoq. Tassanilu nunatsinni imaani uumasunut ajornartorsiutit marluk kingunerluuteqarsinnaasut paasineqartut, Issittoq pillugu ilisimatusarfimmit, Mikael Sejr oqarpoq.

Ajornartorsiutaasoq siulleq tassaavoq assersuutigalugu Young Sundimi imermik tarajoqanngitsumik kangerlummut kuuttoqangaarmat erngup qaavaniittoq 1,5 promillemik tarajukinnerulersimasoq.

Erngup tarajoqanngitsup tarajulik qallertarpaa tarajoqanngitsullu qaavaniilersarluni.

AAMMA ATUARUK Sermersuup aakkiartornera ilimagisamit sukkanerusoq

Ajornartorsiutaasup aappaa apummit iminngortup kangerlummut pisarnerigaa, Mikael Sejr oqarpoq.

- Apummit iminngortup sikup ataatigut 200 meterit missaaniittoq kuuffigaa, tamannalu kangerlummi uumassutsimut ajunngilaq. Young Sundimili sermeq nunami uniffeqarpoq. Tamannalu kangerlaummut ajoqutaammat kangerluk tamangajassuarmi toquliorpoq, Mikael Sejr oqarpoq.

Apummit iminngortoq nunamut kuukkaangami marullorujussuaq amusarpaa taannalu qaaginnaaniilerlugu seqernup saqqarneranik assersuilertarpoq, uumassusillillu, immap sissallu naasui seqernup saqqarneranik pisariaqartitsisut tamatumanik eqqugaasarput, tamanna naggarterpiaani aalisakkat taakkuninga nerisaqartuusut ikilinerannik kinguneqassaaq.

AAMMA ATUARUK Sermersuup naqqata sukkut aakkiartornera takuneqarsinnaalersoq

Ajornartorsiut tamanna annertusiartuinnassaaq sermimmi nunami naaffeqartut amerliartuinnavissapput, tassami sermersuup aakkiartornera ilutigalugu ilorpasinneruleriartorput.

Ilisimatuulli aarlerisaarutigaa nunatta sineriaani Young Sundimi paasisamit malunnarnerungaatsiarsinnaasoq, tassami uani aakkiartornera nunap sinneranit annikinneruvoq.

AAMMA ATUARUK Smeltende indlandsis godt for dyrelivet