Sermersuup naqqata sukkut aakkiartornera takuneqarsinnaalersoq
Sermersuarmi masattumik quasattumillu toqqaveqarnersoq, imaluunniit qaarsumi panertumi nillertumilu nikissinnaanani uninnganersoq sermersuup ingerlaarneranut siunissamilu qanoq pissuseqarnissaanut pingaaruteqarluinnarpoq.
- Sermersuup naqqa aakkiartulersimappat imaluunniit aareersimappat, taava sermersuup naqqani imeqarsinnaavoq sermersuarlu taamaalilluni sukkanerusumik ingerlaalerluni. Silap pissusiata allanngoriartornera taamaalilluni sermersuarmut sunniuteqarsinnaavoq, NASA-mi glaciologi Joe MacGregor, tusagassiorfinnut nalunaarummi taama oqarpoq.
Sermersuup naqqa sukkut aassimanersoq nunap assingani takuneqarsinnaavoq. Aappaluttumik qalipaatillit tassaapput aassimasut, tungujortut suli qerisut qasertullu ilisimasaqarfigineqanngitsut. Asseq: NASA.
NASA-p periaatsit assigiinngitsut sisamat atorlugit nunap assinga suliarisimavaa. Ilaatigut timmisartoq radarilik atorlugu sermersuaq tamaat qulaavaallugu nalunaarsuisoqarpoq, qaammataasat aamma sermip aakkiartorfigisaanik ujarliutigineqarsinnaasut aamma atorneqarsimapput. Aakkiartorfigisaami sermip ingerlaalersinnaaneranik ersersitsisuupput, DR.dk taama allaaserisaqarpoq.
Ilisimatuut sermersuup naqqata qanoq-inneranik maannamut paasisaat eqqoriaanerinnarnik toqqammaveqarput.