Appaliarsuit Tunumi toqorartut
![](/sites/default/files/styles/image_934x467/public/2024-08/20100518-164117-5-4612x3162ma.jpg?itok=_tF7DcCJ)
Tunumi appaliarsuit amerlasuut nassuiarneqarsinnaanngitsumik toqusimapput. Appaliarsuit qanoq amerlatiginersut ilisimaneqanngilaq, pisorli Kalaallit Nunaanni Uumasunut Nakorsaqarfik Inuussutissalerinermullu Oqartussaaffiup tusagassiuutinut nalunaaruteqarneranik kinguneqarpoq.
Oqartussaaffiup Aalisarnermut Piniarnermullu Naalakkersuisoqarfik aamma Pinngortitaleriffik peqatigalugit timmissat katersuleruttorlugillu napparsimanersut misissuleruttorpaat.
Timmissat nualluutaat pasitsaanneqartoq
Timmiaqatigiit toqorarnerannut timmissat nualluutaat pasineqartoq, tamannalu suli uppernarsarneqarsinnaanngitsoq oqartussat allapput. Taakkunanngalu tunillatsinnissannut aarlerinartoq annikippoq.
Taamaakkaluartorli Uumasunut Nakorsaqarfik Inuussutissalerinermullu Oqartussaaffik appaliarsummik toqungasumik attuissagaluaruit malittarisassannik marlunnik kaammattuuteqarpoq.
Assatik imermik qaqorsaammillu errortussagitit – pingaartumik erlaviinik peersisimaguit, aamma erisarnagit ameertassagitit innersuussutigineqarpoq.
Oqartussat tamatuma saniatigut appaliarsummik toqungasumik oqartussanut isumaqatigiissuteqaqqaarlutik attuisassasutit erseqqissaatigaat. Timmissat nualluutaat timmianik manniinillu ooqqissunngorlugit siatsinikkut qalaassinikkullu peerneqarsinnaavoq.
Timmissat nualluutaat oktobarimi aamma ajornartorsiutaavoq. Taamani tunup kitaatalu sineriaanni naajat toqungasut nassaarineqarput.