Anorersuarnerani biilinik ajutoortoq: Soriarsinnaasimanngilanga

- Biilimi ilaasut tamarmik nalunngilaat apulersugut- tassa ajutuulersugut. 

Inuk Angunnguaq Lund Heilmann, Nuummi anorersuartoqareernerata kingorna taama oqaluttuarpoq. 

Ippassaq ullaarnganiit ualinerata tungaanut Nuummi anorersuarpoq. Bussit unitsinneqarput inuillu angerlarsimaannarnissaannik kaammattuuteqartoqarpoq. 

Anorersuaraluartorli inuit ilaat aqqusinermi angallattunut akuupput. 

Taakkunanilu ilaavoq Inuk Heilmann, illoqarfimmi sanasuni sulisoq. 

- Inuit tamatta computerip saavaniittutuulli angerlarsimaannarsinnaanngilagut suliartortariaqartarpugut- tassa taamaaginnarpoq, taanna oqarpoq. 

Quaarujussuartoq

Inuk Heilmann tallimanngornerup ullaavani suleqatini aareerlugit illoqarfimmiik 400-rtalimmiik Nuussuup tungaanut ingerlaarput. 

Aqqusineq aputeqartorujussuuvoq igalaakkullu takusaqarpiarsinnaanngilaq. 

- Taamaammat ammukajaakkut eqqissiivillunga kigaatsumik ammukarpunga, sukkalisaanngiivillunga, taanna oqarpoq. 

Taamaakkaluartoq ajutoorput. 

- Biili quaalerpoq uangalu soriarsinnaajunnaarpunga. Aqqutaa ammut tamaat quaappugut qullersuarmullu aporluta, Inuk Heilmann oqarpoq. 

Sivitsunngitsorlu biili alla 400-rtalimmiik ammut aallarpoq. 

- Biili taanna aamma quaappoq sakkortuumillu sanitsinniik aporpaatigut. Kisianni oqaaseqarnatillu ingerlaannarput, Inuk oqarpoq. 

Inunnik ajoqusertoqanngilaq Inuk Heilmannili suleqataalu tupaqaat, taanna oqaluttuarpoq. 

Illit ilatillu ullumikkut ajunngilasi? KNR aperivoq. 

- Aap tamatta ajunngilagut qungujulavugullu. Ajoqusertoqanngilaq, ajunngilagut, Inuk Angunnguaq Lund Heilmann taama oqarpoq. 

Krani uppittoq

Politiit ippassaq anorersuartoqarnerani aseruatitertut qanoq annertutiginerinik suli iluamik ilisimasaqanngillat. 

Biilit arlallit sisoorlutik ajutooreerneranni Kissarneqqortuunnguani aamma krani uppissimasoq kalleriutigineqarpoq. 

- Kranip uppinnerata kingorna inuit qimagutitinneqarput inunnilli ajoqusertoqanngilaq. Tassa taanna kisimi kalleriutigineqarpoq, Jørgen Madsen Kalaallit Nunaanni politiit pigaartuisa pisortaat taama oqarpoq. 

Politiit pigaartuisa pisortaata politiit angerlarsimaannarnissamik inassutaat inuit malilluarsimagaat oqaatigaa.