Illersornissaqarfiup Isertortumik Paasiniaasartuini ilisarnartoq pisortanngussasoq
Illersornissaqarfiup Isertortumik Paasiniaasartuini (FE) septembarip aallaqqaataani qullersatut inissisimalertussaq ilisarnartuuvoq.
Thomas Ahrenkiel piffissami 2010-mit 2015-imut atuuffigereersimasamini FE-mi pisortatut toqqarneqarpoq.
Tusagassiutinut nalunaarummi Illersornissamut Ministereqarfik taama ilisimatitsivoq.
Illersornissaqarfiup Isertortumik Paasiniaasartuini pisortaasimasup Lars Findsenip angerlartitaanerani pisortaagallartoq Svend Larsen Thomas Ahrenkielip taarserpaa.
Thomas Ahrenkiel 57-inik ukiulik siunnersuisarfimmi Macro Advisory Partnersimi piginneqataallunilu Europami pisortaavoq.
Isumannaallisaanermik nukittorsaaniartoq
2015-imi Illersornissaqarfiup Isertortumik Paasiniaasartuini pisortatut soraarnermi kingorna 2020-p tungaanut Illersornissamut Ministereqarfimmi pisortanngorpoq. Siornatigut Naalagaaffiup Ministereqarfiani Nunanullu Allanut Ministereqarfiani qaffasissunik atorfeqarsimavoq.
- FE-mut uternissannut Danmarkillu isumannaallisarnissaanut nukittorsaaqataanissannut qilanaarpunga, tusagassiutinut nalunaarummi oqarpoq.
FE Ahrenkielimik pisortaqarluni suliassaqarfimmi ilisimasaqalluangaassutsimik misilittagaqalluassutsimillu peqalissasoq, Illersornissamut ministeri Troels Lund Poulsen (V) tusagassiuutinut nalunaarummi oqarpoq. Aamma Svend Larsen pisortaagallartutut sulilluarsimanera pillugu qutsavigaa.
- Svend Larsen piffissami ilungersunartumi Illersornissaqarfiup Isertortumik Paasiniaasartuini aqutsisuni akisussaaffimmik tigusivoq. Suliassaq tamakkiisumik naammassivaa - aamma Ukrainemi sorsunnerup Danmarkimut ilitsinnullu unammillernartunik kinguneqarnera eqqarsaatigalugu, ministeri oqarpoq.
/ritzau/
