Politikeriusimasut aningaasarsiaat pillugit politikkikkut oqaaseqartartoq: - Naleqquppat?

Politikeriusimasunut aningaasarsiat ullormut oqaluuserisassanut ilanngunneqartariaqaraluartut. Politikkikkut oqaaseqartartoq Jenseeraq Poulsen isumaqarpoq, taanna ukiuni arlalinni politikkip ineriartornera pillugu tusagassiorfinnut arlalinnut oqaaseqartarpoq.

- Siullermik isumaqarpunga taassallugu pingaaruteqartoq eqqartorneqarnera taanna pissusissamisoorpoq, Jenseeraq Poulsen oqarpoq nangillunilu:

- Inuiaqatigiit atugaat ullumikkut assigiinngitsunik nikingasorujussuupput aamma ukiuni kingullerni nunatsinni inuuniarneq oqinneruleriartunngilaq. Akissaatitigut taanna kinguussaaqqasutut misigisimaneq pisiassallu ulluinnarni akitsoriartuinnartut taakkua eqqarsaatigigaanni nunatsinni eqqartuineq pissusissamisoorpoq, taanna oqarpoq.

Politikerit qinersisoqareernerata kingorna qinigaaqqinngitsut ilaasortaajunnaareeraluarlutik piffissami aalajangersimasumi aningaasarsiaqaannarnissaq piumasaqaataavoq. Inatsisartunut Naalakkersuisunullu ilaasortaasimasunut katillugit 5,7 millionit koruunit missaat ilaasortaajunnaarnermusiaritinneqartussat KNR-imiit uani sapaatip akunnerani sammivagut. 

Oqallisigineqarnerusariaqartut

Ilaasortaajunnaarnermusiat aaqqissuussaanerat arlalinnik sammiveqarluni eqqartorneqarsinnaasut Jenseeraq Poulsenip oqaatigaa.

- Isumaqarpunga taanna isiginarneqartariaqartoq angissusaa naapertuunnersoq, illuatungaani inatsisartunut ilaasortaanerup akissaatitigut inissisimatinneqarnera aamma eqqartorneqarsinnaavoq soorunami akisussaaffimmut tunniunneqarsimasumut naapertuuppa? taanna oqarpoq.

- Qinikkatut akisussaaffik qaffasippoq nuna tamakkerlugu naalagaaffilerinermi aamma taanna eqqartorneqartarpoq, inatsisartuni ilaasortaaneq allani sanilliunneqarsinnaaneq ajorpoq ulluinnarni atukkatsinnut sunniutilerujussuarnik aalajangiisoqartarami, taamaattumik akisussaaffik annertoorujussuuvoq, Jenseeraq Poulsen oqarpoq.

Naak Inatsisartuni naalakkersuisunilu ilaasortaajunnaarnermusiaqarneq suliffeqarfimmit soraarsitaanermi aningaasarsiaqartarnermut partiit sanillersuukkaluaraat. Suliffeqarfeeqqanut sanillersuunneqarsinnaanngitsoq Jenseeraq Poulsen isumaqarpoq.

- Suliffeqarfeeqqamut assersuunneqarsinnaanngilaq kisianni inuiaqatigiit ulluinnarni atugaannut sanilliullugu nalilersorneqarsinnaavoq, taanna oqarpoq.

Marloqiusamik aningaasarsiaqarneq

Ilaasortaajunnaarnermusiat aaqqissuussaanerat oqallisigineqartillugit politikeriusimasut suliffittaarniarnerat ajornakusoorsinnaasoq ilaasortaajunnaarnermusiallu ikaarsaariarnermi qulakkeerinnittussaasut tunngavilersuutigineqakkajuppoq.

Politikeriusimasut ikaarsaariarnerminni suliffittaarniarnerat ajornakusoorsinnaavoq. Taamaammalu ilaasortaajunnaarnermusiat aningaasaqarniarnikkut qulakkeerinnittussaasut ilaasortaajunnaarnermusiat aaqqissuussaanerata oqallisigineqarnerani tunngavilersuutigineqakkajuppoq.

KNR-imiilli ilisimasat naapertorlugit inatsisartuni naalakkersuisunilu ilaasortaasimasut arlallit suliffeqalereerput -  taamaalillutik marloqiusamik isertitaqassallutik.

Isummersorfigineqartariaqalertoq Jenseeraq Poulsen isumaqarpoq:

- Taanna assigiingitsunngorlugu eqqartorneqarsinnaasoraara aamma allatuulli, soorunami inuiaqatigiinnut sanilliuttariaqarporaasiit marloqiusamik akissaateqarneq naapertuuppa? malittarisassat naapertuuppat? taanna oqarpoq nangillunilu:

- Inatsisartunut ilaasortaasimagaanni naalakkersuisuusimagaanni inuiaqatigiinnullu taamak akisussaaffimmik tigumminnissimalluni aamma soraarnerup kingorna akisussaaffimmik tigusisariaqarsoraara ilisimallugu nunatta karsiani aningaasat qanoq inissisimanersut, ilumut tigussavakka taakku aningaasat? Jenseeraq Poulsen oqarpoq.