Politikeri: - Politikeriusimasut akissarsiai pissusissamisoorput

Inatsisartunut marsip aqqarngani qinersisoqarmat inatsisartunut ilaasortaajunnaartut 18-it aningaasarsiaqartinneqaannarnerat apeqqusersorneqassanngitsoq politikerit isumaqarput.

Allattoq Marie Kuitse, Paarnannguaq Nielsen

maajip 21-at 2025 10:52

3,6 millionit koruunit.

Tassa marsip arfineq pingajuanni Inatsisartunut qinersisoqarmat, inuit 18-it Inatsisartunut ilaasortaajunnaareeraluartut akissarsiassaat taama amerlatigipput, tamanna KNR allagaatinik takunnissinnaatitaanermut pissarsiaminik paasivaa.

Inuit 18-it Inatsiartunut ilaasortaajunnaareeraluartut suli ilai akissarsiaqartinneqarput. Inatsisartunut ilaasortaasimasut ilaasortaajunnaarnersiutinik taallugu suli akissarsiaqartinneqarput, taakkuli ilai atorfimmik allamik atorfinitsitereerput. Taakku Inatsisartunut ilaasortaajunnaarnersiutai, ukiut qassit Inatsisartuni ilaasortaasimanerat apeqqutaalluni qanoq annertutigisunik akissarsiaqartartinneqartarnersut apeqqutaasarpoq.

Taakku pillugit partiit tamakkerlugit KNR-ip oqaaseqartinnikuuai. Taamatullu inatsisartunut ilaasortaajunnaarnersiuteqarneq apeqqusersorneqartariaqanngitsoq, Siumumeersoq, Erik Jensen, isumaqarpoq:

- Taamaattumik apeqqusersuiniarneq aammalu qinikkat taamatut assigiinngitsut taarserneranni inatsisinik malitassanik toqqammaveqarluni taamatut aningaasanik pisussaaffimmik naammassinninneq apeqquserneqarsinnaanngitsoq, Erik Jensen oqarpoq nangillunilu:

- Nalunngilarpummi inuiaqatigiinni annertoorujussuarmik kivitseqataanikuusut.

Pisussaaffiuvoq

Inatsisit malillugit inatsisartunut ilaasortaajunnaarnersiuteqarnissaq pisussaaffiuvoq.

Taakkuli inatsisartut qanoq sivisutigisumik ilaasortaasimanerat aallaavigalugu qaammatit qassit akissarsiaqartinneqarnissaat inissinneqartarlutik.

Inuk ataaseq qaammammut 38.150 koruunit missaannik tunineqartarpoq. Uanili qinigaaffimmi inatsiartunut ilaasortaajunnaartut marluk assersuutigissagaanni ukioq ilivitsoq akissarsiaqartinneqassapput, aamma suliffimmut allamut atorfinereeraluartulluunniit.

Politikerit qinigaaqqinngitsut ilaasortaajunnaarnersiutaat

Inatsisartunut martsimi qinersisoqarmat inatsisartunut ilaasortaasimasut 18-it qinigaaqqinngillat. Taakku ilaasortaajunnaarnersiutinik akissarsiaqartinneqassapput.

Politikeriusimasut 18-it katillugit 3,6 millionit koruuninik akissarsiaqartinneqassasut, KNR-ip allagaammi pissarsiaani takuneqarsinnaavoq.

Inatsisartunut ilaasortaasimasut marluk ukioq ilivitsor akissarsiaqartinneqassapput, ataaseq qaammatit qulit affarlu, ataaseq qaammatit arfineq pingasut ullullu qulit, inuit tallimat qaammatit qulit kiisalu marluk qaammatinik pingasunik akissarsiaqartinneqassallutik.

Taakku saniatigut Inatsisartunut sinniisuusimasut arfineq marluk aamma akissarsiaqartinneqarput.

Allisiguk

Tamannali pisussaaffiummat periarfissaq, Erik Jensenimit taperserneqarpoq.

- Ilaasortaajunnaarnersiutit pisussaaffiupput, politikkikkut suliaqarsimalluni taava suliffeqarfimmut allamut pulaniaraanni ajornartorujussuusarpoq maani nunatsinni pissutsit taamaatsillugit pissutigalugu qalipaasersuineq allatullu isumaqarneq tunngavigalugu ilaatigut suliffeqarfinnut appakaanniarnerat inuppassuit ajornartorsiutigisarsimavaat, Erik Jensen oqarpoq.

Politikkimi sulineq akisusoq

Qinikkatut suligaanni inuttut pilliuteqarfigingaatsiarneqartartoq, ukiunik arlalinngortunik politikkeriusoq Aqqalu Jeremiassen KNR-imut oqaluttuarpoq.

- Politikkimi sulineq inuttut annertoorujummik akeqartarami allatut isigineqalerneq, naqissuserneqartarneq, akerartungaasarnerit, nikanarsarneqartarnerit sorpassuillu aqqusaarneqartarput. Taamaammat allatut ajornaqaaq minnerpaamilluunniit taamannak inissiinikuuneq atugassaqartitsinneq inuunermut nalinginnaasumut utersaariartuaaleqqiffimmi politikkiminngaanniit isummat anillatsikkiartorrani allatut ajornaqaaq atugassarititat taamaattariaqarput.

Atassut siulittaasua Aqqalu C. Jerimiassen oqarpoq.

Erik Jensenillu Aqqalu C. Jerimiassen taperserpaa, ilaasortaajunnaarnersiallu eqqartorneqarnissaat Siumumit pissusissamisoorsorineqanngilaq.

- Qinikkat soorlu assersuutigiinnarlugu meerartalinnut atukkat imaannaannngitsorujussuit, sinerissamiittut ilaquttatik qimallugit pilliuteqarnikorujussuit taamatut isiginnitariaaseq tulluartuusorinngilarput qinikkanut annertuumik aningaasanik tunisinertullusooq soorlu nipeqartinniarnissaa isumaqanngilagut pissusissamisoortoq Siumuminngaanniit eqqartussallugu, Erik Jensen (S) oqarpoq.

Allaaserisap saqqummertussap tulliani Naleqqap, Inuit Ataqatigiit kiisalu Demokraatit inatsisartunut ilaasortaajunnaarnersiutit pillugit isumaat atuarsinnaavat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.