Tulleriiaarneqarneri takukkit: Siornatigut Inatsisartuni ilaasortaasimasunut akissarsiat millionit koruunit arlallit

Siusinnerusukkut Inatsisartuni ilaasortaasimasut 18-it maana inatsisartuni atorfeqarunnaareerlutik kingoraartinneqarnermut akissarsiaqarput.

Allattoq Irene Jeppson

maajip 19-at 2025 07:30

Nutserisoq Erninnguaq Reimer

Inatsisartunut qinersineq marsip aqqarnani pisoq Naalakkersuisunik nutaanik qinersineriinnaanngilaq, Inatsisartuni ilaasortat 18-it qinigassanngortittut inatsisartunut iseqqinngitsut inuulluaqquneqarput.

Naak ilaasortat 18-it Inatsisartut ataatsimiittarfiani suliunnaaraluartut, suli maanna akissarsiaqartarput.

Inatsisartuni ilaasortaq soraarsimagaangat, kingoraartinneqarnermut akissarsiaqarnissamut pisinnaatitaavoq – Ilaasortap ukiut qassit atorfilittatut suliffigisimaneranut naapertuutillugit, tamatuma sivisussusaa aalajangerneqartarpoq. Ataatsimut ukiut aallartinneqartut tamaasa malillugit ilaasortaq qaammatini marlunni arfarmilu kingoraartinneqarnermi akissarsianut pisinnaatitaalertarpoq. Kisianni minnerpaamik qaammatini pingasuni, annerpaamillu qaammatini aqqaneq marlunni akissarsiaqarsinnaavoq.

Aamma atuarukKilitsissiatut suliaqarneq pillugu qisuariarnerit: Nunatsinni politikerit sinniisoqarfimmik matusinissaq oqaluusererusukkaat

Doris Jakobsen Jensen Siumumeersoq aammalu Peter Olsen Inuit Ataqatigiinneersoq, kingoraartinneqarnermi akissarsiat qaammatini aqqaneq marlunni annertunerpaamik tunineqartartut akornanniipput . Marluullutik ukioq naallugu qaammatit tamaasa 38.150 koruuninik akissarsiaqarput – ukioq naallugu katillugit 457.800 koruuniusunik. Tamanna allakkat KNR-ip takunniffigisinnaasaasa takutippaat.

Sinniisut akissarsiaat

Siusinnerusukkut ilaasortaasimasut piffissamik annikinnerusumik kingoraartinneqarnermut akissarsiaqarput. Mikivsuk Thomassen (IA) qaammatini qulini affarmilu tunineqarpoq, Jess Svane Siumumeersoq qaammatini arfineq-marlunni ullunilu qulingiluanik kingoraartinneqarnermut akissarsiaqarpoq. Ilaasortat tallimat siusinnerusukkut ilaasortaasimasut tamarmik qaammatini arfinilinni kingoraartinneqarnermut akissarsiaqarput.

Inatsisartuni ilaasortaasimasut sorliit qanoq sivisutigisumik kingoraartinneqarnermik akissarsiaqarnerat

Doris Jakobsen Jensen (S) aamma Peter Olsen (IA) qaammatini aqqaneq marlunni kingoraartinneqarnermut akissarsiaqarput.
Mikivsuk Thomassen (IA) qaammatini qulini affarmilu kingoraartinneqarnermi akissarsiaqarpoq.
Jess Svane (S) qaammatini arfineq-marlunni ullunilu qulingiluanik kingoraartinneqarnermut akissarsiaqarpoq.
Mala Høy Kúko (S), Karl Tobiassen (S), Kristian Jeremiassen (IA), Knud Mathiassen (N) kiisalu Eqaluk Høegh (IA) tamarmik qaammatini arfinilinni kingoraartinneqarnermut akissarsiaqarput.
Hans Peter Poulsen (S) aammalu Kalistat Lund (IA) tamarmik qaammatini pingasuni kingoraartinneqarnermi akissarsiaqarput.

Kingoraartinneqarnermut akissarsiat qaammatit tamaasa tunniunneqartarput, ilaasortap siusinnerusukkut aalajangersimasumik aningaasarsiarisartagai tunngavigalugit. Tassa ilaatigut ilaasortamut akissarsiat nalinginnaasut, kisianni ilanngullugit imikkuullaritsumik aningaasartuutinut tapiliussaq – maannakkut ilaasortanut tunniunneqartartoq – tunniunneqanngilaq. Tapiliussaq taanna nalinginnaasumik aningaasartuutinut atatillugu matussusiisussaavoq, soorlu atuagassanik piginnaasaqarnerulersitsisunik, telefonimut aningaasartuutit, imaluunniit angalanermut aningaasartuutit, ilaasortaanermut atatillugu atorneqartartut.

Aamma sinniisut, ilaasortap taarserneratigut sivisuumik sulisimagunik, kingoraartinneqarnermut akissarsiaqarnissamut pisinnaatitaaffeqarput. Malittarisassat naapertorlugit, ullormut ataatsimut aningaasarsiaqarsinnaapput ullut arfineq-pingasut taarseeqqasimanerannut atatillugu.

Ataatsikkut marlunnik akissarsiaqarsinnaaneq periarfissaqanngilaq.Inatsisartuni ilaasortanut imaluunniit naalakkersuisuni ilaasortanut akiliutigineqartartunik marlunnik tigusisinnaaneq piusinnaanngilaq. Tassa kingoraartinneqarnermut akissarsiaqarsinnaanngilaq, taamaattumillu aamma naalakkersuisunut ilaasortaanermut atatillugu aningaasarsiaqarnermi ilaasortaanermut akissarsiat ataatsikkut pissarsiarineqarsinnaanngillat.

Sinniisut kingoraartinneqarnermut akissarsiaqarsinnaapput – taama sivisutigisumik

Jens Kristian Therkelsen (S) kingoraartinneqarnermut akissarsiaqarpoq ullut 135-t.
Dines Mikaelsen (S) kingoraartinneqarnermut akissarsiaqarpoq ullut 132-t.
Agathe Fontain (IA) kingoraartinneqarnermut akissarsiaqarpoq ullut 111-t.
Najaaraq Møller (S) kingoraartinneqarnermut akissarsiaqarpoq ullut 84-t.
Adam Kristensen (IA) kingoraartinneqarnermut akissarsiaqarpoq ullut 41-t.
Juliane Enoksen (IA) aamma Edvard Nielsen Aronsen (IA) kingoraartinneqarnermut akissarsiaqarput ullut 22-t.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.