Kissarneqqortuunnguani najugaqartut kranip uppissimanera pissutigalugu qimagussorneqassasut
Kissarneqqortuunnguami najugaqartut timersortarfimmut Inussivimmukassapput. Angerlartoqassanngilaq, angerlarsimasullu anillutik Inussivimmukassapput.
Kalaallit Nunaanni Politiit taama nalunaaruteqarput.
Sanaartorfimmi kranip nalunaaqutaq aqqarnup missaani uppinnera kiisalu kranit allat marluk aamma upperatarsinnaanerat tamatumani pissutaavoq.
- Sullifinnik nakkutilliisut, qatserisartut politiillu sumiiffimmi najuupput, silallu qanoq allanngoriartornera malinnaavigaarput, Kalaallit Nunaanni Politiit pigaartuisa pisortaat, Aputsiaq Hansen oqarpoq.
Najugaqartut 77-it missaanniittut maannamut qimagussorneqareerput, sumiiffiullu eqqaani najugaqartut tamarmik timersortarfimmut Inussivimmukassasut, pigaartut pisortaata erseqqissaatigaa.
Piffissami matumani ajoqusertoqanngilaq, tamannali sillimaniarnermik pissuteqartoq, Aputsiaq Hansen oqarpoq.
