Inatsisartunut ilaasortaajunnaarnermusiat millionilikkaat oqallisigineqassasut partiit arlallit isumaqartut

Inatsisartunut ilaasortaajunnaarnermusiat tunniunneqartarnerat Demokraatinit, Inuit Ataqatigiinnit Naleqqamiillu assigiingitsumik isummerfigineqarput.

Allattoq Paarnannguaq Nielsen, Marie Kuitse

maajip 22-at 2025 16:00

Politikeriusimasut qinersisoqareernerata kingorna qinigaaqqinngikkaluarlutik aningaasarsisarnissaminnut pisinnaatitaaffeqartut, inatsimmi allaqqavoq.

Inatsisartunullu ilaasortaajunnaarnermusiat nalilersorneqaqqittariaqartut Demokraatit sinnerlugit oqaaseqartoq Margrethe Thårup Andersen isumaqarpoq:

- Inatsisartuujunnaartarnermut tunngatillugu oqaatigisattuulli nalilersoqqinneqartariaqarput, tamatta assigiinngisitaartunik inissisimasarpugut inissisimanerpullu tunngavigalugu eqqartuisarnissaq pingaaruteqarpoq, Margrethe Thårup Andersen (D) oqarpoq.

Ilaasortaajunnaarnermusiat politikeriusimasunut tunniunneqartarnerat nuntsinni 2003-imiilli ileqquuvoq.

Aamma atuaruk Tulleriiaarneqarneri takukkit: Siornatigut Inatsisartuni ilaasortaasimasunut akissarsiat millionit koruunit arlallit

Inatsisartuusimasunut Naalakkersuisuusimasunullu ilaasortaajunnaarnermusiat 5,7 millionit koruunit missaanniittut tunniunneqartussat KNR-imit ataasinngornermi saqqummiupparput.

Inatsisartunut marsimi qinersisoqarmat qinigaaqqinngitsut 18-it 3,6 millionit koruunit missaannik ilaasortaajunnaarnermusiaritinneqassasut KNR-imiit ataasinngormat saqqummiupparput.

Ilaasortaajunnaarnermusianilli oqallisiginninneq Demokraatinut nutaajunngilaq. Ilaasortaajunnaarnermusiammi aaqqissuussaanerata oqallisigineqarnissaa qinigaaffiup siuliani ullormut oqaluuserisassanut siunnersuutigisareerpaat.

Ilaasortaajunnaarnermusiaqarneq pissusissamisuunngitsoq

Oqallinnissarlu pisariaqartoq Naleqqami siulittaasoq Pele Broberg aamma isumaqarpoq.

- Ullumikkut neriorsuuterpassuit namminiilivinnissaq, kalaallit ineriartornissaat, tamatta ineriartornermut peqataatilluta oqarluartaarutit amerlaqimmata timitaalu peqaratik, taamaammat naamik akissarsiaqarneq inatsisartuni taavalu aamma inatsisartuujunnaaraani inissisisimanera uanga pissusissamisoortutut isiginngilara, taanna oqarpoq.

Inatsisartut inatsisaat qiviaraanni inatsisartunut naalakkerusisunullu ilaasortat ilaasortaajunnaarnermusiaqarnissaminnut pisinnaatitaaffeqarput.

Naalakkersuisuusimasut arfinillit marsimi qinersisoqareernarata kingorna ilaasortaajunnaarnermusiaqartinneqassapput. Allakkat KNR-ip takunniffigisinnaasaasa takutippaat.

Aamma atuarukNaalakkersuisuusimasunut akissarsiassat millionit koruunit arlallit

Politikeriusimasut akissarsiaqaannartarnerat inissaminiittoq, naalakkersuisuusimasoq inatsisartunilu siulittaasuusimasoq Inuit Ataqatigiinneersoq Mimi Karlsen isumaqarpoq.

- Soorunami aningaasat 3 millionit allarpassuarnut atorneqarsinnaapput nalunngilarput meeqqanut ilaqutariinnut inuusuttunut utoqqarnullu aningaasanik atuisinnaagaluarluta, kisianni tassa suliffeqarfiit tamarmik aamma uani inatsisartut tassa taamannak inissisimasarput, taamatut suliunnaarnermi isumannaarinnittoqartarluni, taanna oqarpoq.

Soraarnermut assingusoq

Mimi Karlsen naapertorlugu qinigaaqqinngitsoorneq suliffimmi soraarnermut assersuunneqarsinnaavoq.

- Suliffigisaq qimanniarlugu aalajangeraanni qaammatinik pingasunik sioqqutsilluta nalunaartarpugut, inatsisartuni taamaassinnaannginnatta, inatsisartuni qanorluunniit iliallannikkut qinersisoqarnissamik suaarutiginnittoqarsinnaavoq, taamaalillunilu aamma inatsisartuni ilaasortat akunnassisarluni suliffimmut allamut nuunniarnissaq qinigaaqqinngikkaanni, Mimi Karlsen (IA) oqarpoq.

Inatsisartuni ilaasortaasimasut sorliit qanoq sivisutigisumik kingoraartinneqarnermik akissarsiaqarnerat

Doris Jakobsen Jensen (S) aamma Peter Olsen (IA) qaammatini aqqaneq marlunni kingoraartinneqarnermut akissarsiaqarput.
Mikivsuk Thomassen (IA) qaammatini qulini affarmilu kingoraartinneqarnermi akissarsiaqarpoq.
Jess Svane (S) qaammatini arfineq-marlunni ullunilu qulingiluanik kingoraartinneqarnermut akissarsiaqarpoq.
Mala Høy Kúko (S), Karl Tobiassen (S), Kristian Jeremiassen (IA), Knud Mathiassen (N) kiisalu Eqaluk Høegh (IA) tamarmik qaammatini arfinilinni kingoraartinneqarnermut akissarsiaqarput.
Hans Peter Poulsen (S) aammalu Kalistat Lund (IA) tamarmik qaammatini pingasuni kingoraartinneqarnermi akissarsiaqarput.

Ilaasortaajunnaarnermusiaqarneq suliffimmit soraarsitaanermi aningaasarsiaqartarnermut aamma sanillersuunneqarsinnaasoq Demokraatiniit Margrethe Thårup Andersen isumaqarpoq.

- Inatsisartunngortut assigiinngisitaartunik inissisimaffeqartarput tamatta assigiingisitaartunik atorfeqartarpugut suliffillit arlaatigut soraarsitaasimagaangata kinguneranik atugassaqartitaasarput soorlu soraarsitaanerup kingorna aningaasarsisitsisoqartarpoq, Margrethe Thårup Andersen (D) oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.