Folketingimi naggataarutaasumik oqallinneq: Akigititanik qaffaanerit, saammaateqatigiinneq asanninnerlu pillugu apeqqut
Akigititanik qaffaanerit, aningaasaliinerit, saammaateqatigiinneq namminiilivinnerlu. Tamakku naggataarutaasumik oqallinnermi Folketingimi politikerit marluk, Aaja Chemnitzip (IA) aamma Aki-Matilda Høegh-Damip (N), oqalugiarnerminni ukkataraat.
Aki-Matilda Høegh-Dam naapertorlugu nunatsinni inuuniarnikkut atukkat oqiliartunngitsut pillugit Danmark akisussaaffimmik annerusumik tigusisariaqarpoq.
- Nerisassat akitsoriartorput. Uunga killeqqavugut allaat anaanaq kisimiittoq meeqqaminut nerisassanik nangernilluunniit pisissanerluni aalajangertariaqarluni.
- Nuummi punneq 60 koruuneqarpoq, nunallu sinnerani akisunerulluni, Aki-Matilda Høegh-Dam oqarpoq.
Inuussutissallu akisuut – aap, Danmarkimit eqqunneqartarput. Taamaattumik Danmarkip kalaallit inuinik pingaartitsingaarnerusariaqarnissaa Høegh-Damip kissaatigaa.
Tamanna ilaatigut aningaasaliinikkut pissaaq.
- Ministeriuneq (Mette Frederiksen, aaqq.) ullumi oqarpoq Kalaallit Nunaannut aningaasanik amerlanerusunik tunniussinissaminut piareersimalluni. Sipaaginnarnani Kalaallit Nunaanni pisariaqartitanik aallaaveqarniarnera nuannaarutigaara, Aki-Matilda Høegh-Dam oqarpoq.
Saammaateqatigiinnissamik piumasaqartoq
Aaja Chemnitzip Inuit Ataqatigiinneersup aamma oqalugiaammini aningaasaliinissaq sammivaa. Maannakkorpiarmi Kalaallit Nunaanni pissutsit taarsiornarput.
- Aningaasaqarnikkut ilungersunartumik oqimaaqatigiinngitsumik inissisimanissamut qallinerput, tassa naalagaaffiup isertitai aningaasartuutaalu imminnut ungasilliartuinnarnissaat, Aningaasaqarnermut Siunnersuisoqatigiit mianersoqqussutigaat. Tamanna ukiorpassuarni oqaluuserisarnikuuarput, maannali tamanna oqimaaqatigiinnginneq qalliartorparput.
- Tamatuma nalaani kalaallit Danmarkimut nuuttut amerliartorput. Tamannalu naligiinngissuteqalersitsivoq, maannami inuiaqatigiinni kalaallit sulisartut amigaatigilereerpavut.
Taamaattumik Aaja Chemnitzip periarfissaq atorluarlugu Danmarkip ineriartornerup ajortup matuma allanngortinnissaanut qanoq ikiuutaasinnaaneranik isumassarsiani saqqummiuppaa.
- Attaveqaasersuutitta ineriartortinnissaat pingaaruteqarpoq. Soorlu umiarsualiviit, Sisimiut Kangerlussuullu akornanni aqqusineq aammalu digitalimik attaveqaasersuutitsinnik qulakkeerinnittussanik immap naqqatigut kabelinik amerlanernik sanaartorneq.
- Ataatsimoorluta aningaasaliinermut aningaasaateqarfimmik pilersitsinissarput pingaaruteqarpoq.
- Naalagaaffimmit qularnaveeqqusiisoqarnissaa pingaaruteqarpoq, aningaasaliisartut namminersortut kajungilersinniassagatsigit, pensionskasset isumannaarlugit aamma inuiaat kalaallinut amerlanerusunik aningaasaliisoqarnissaanik kissaateqarluta, taanna oqarpoq.
Tamanna asanninnerua?
Taamaalisukkut IA-mi politikkerip, Danmarkimik nukittuumik suleqateqarneq nuannaarutigalugu erseqqissarpaa. Taamaakkaluartoq ataatsimut siunissaqaqatigiissagaanni saammaateqatigiittoqartariaqarpoq.
- Saammaateqatigiinneq suleqatigiilluarnermut piumasaqaataavoq. Erseqqissaanissamut tuaviuussinissarput pingaaruteqarpoq, spiralilersuisimanermut, inatsisitigut ataataqanngitsut, inatsisitigut tunngavissaqanngitsunik meeravissianngortitsinerit minnerunngitsumillu oqaluttuarisaanermik qulaajaanissaq tamatta utaqqisatsinnut tunngasuussapput, taanna oqarpoq, saammasseqatigiinnissamullu isumalioqatigiissitaqarnissamut periarfissaq oqaatigalugu.
Aki-Matilda Høegh-Damip namminiilivinnissaq pillugu kissaateqarneq oqaasertalerpaa. Tamanna tikini qullarlugu kalaallit kissaataat pillugu qallunaat politikerit tapersersueqqullugit pivoq.
Tassami Kalaallit Nunaanni partiini ataaseq minillugu sinnerisa namminiilivinnissaq kissaatigaat, taanna oqarpoq.
- Qinikkammi arlaqarput Kalaallit Nunaannut uummateqartut allallu Kalaallit Nunaat asagissi oqarpusi. Kisianni sooq taava kissaativut oqaatigigaangatsigit soqutigineqarneq ajorpugut, oqallorissaarluni aperivoq nangillunilu:
- Sooruna naalagaaffinngornissaq kissaatigalutigu oqaraangatta taperserneqarneq ajortugut? Taamaammat apeqqut unaavoq, qanoq Kalaallit Nunaannut asanninneq pineqartigiva imaluunniit Danmarki nunarujussuarmik piginnittuunera asaneqarnerunerpa?
