Jens-Frederik Nielsen folketingimut: - Siumut qiviarneq kingumut qiviartarnitsituulli pingaaruteqartigisoq
Naalakkersuisut siulittaasuat Jens-Frederik Nielsen (D), folketingimut ataasinngormat ualikkut tikeraarnerani qallunaat ministeriisa, partiit siuttuisa ataatsimiititaliallu siulittaasuisa assamminniarlugu piareersimasimapput.
Jens-Frederik Nielsen arfininngornermiilli Danmarkimut tikeraarpoq, qallunaat ministeriunerat Mette Frederiksen (S) peqatigalugu politikkimi sulianik oqaloqatigiipput. Ilaatigut namminersorneq pillugu inatsip allanngortinneqarnissaa oqaloqatigiissutigaat.
Naalakkersuisut siulittaasuattut siullermeerluni tikeraarpoq.
- Kalaallit Nunaat Danmarkilu ajunngisunik nuanniitsunillu sivisuumik ataatsimut oqaluttuarisaanermi ataatsimooruteqarput, taamak Jens-Frederik Nielsen qallunaat politikeriinut oqalugiutimini aallarniivoq nangillunilu:
- Uannut siumut qiviarneq kingumut qiviartarnitsituulli pingaaruteqarpoq.
Kalaallit Nunaanni periarfissat amerlasuut pillugit oqalugiarnermini oqatigeqqippai.
- Neriulluarniartunik nutaanillu sammisaqarusuttunik innuttaasorpassuaqarpugut, Kalaallit Nunaata siuariartornissaanut qulakkeerinissamut sulerusulluta, kisianni aamma nunat marluk akornanni naligiinnerusumik ataqatigiinnissamut qulakkeerissalluta piareersimavugut.
- Nukittuumik tunngaviliorusuppugut. Nammineerusuppugut. Oqaatigikulavarput. Aamma tamanna takutikkusupparput, Jens-Frederik Nielsenip oqalugiarnini taamak naggaserpaa, ersaattaanneqarujussuarlunilu.
Inissisimaffik sivisuallaamik uninngaffigineqarsimasoq
Naalakkersuisut siulittasuata tikeraarnini Facebookikkut aamma oqaaseqarfigaa. Tassani allappoq:
- Naalagaaffeqatigiinneq maannakkut piusumi nukittuutut inissisimavugut. Tamannalu atorluassavarput.
- Maannakkut inissisimaffik sivisuallaamik uninngaffigineqarsimasoq alloriarfigeqqissavarput, nunatsinnut tamatsinnullu iluaqutaasussamik.
Folketingip siulittaasoqarfiani siulittaasup, Søren Gadep (V), oqalugiarnikkut Jens-Frederik Nielsen Folketingimut tikilluaqquaa.
- Danmarki Kalaallit Nunaallu pingaartitanik taamatuttaaq oqaluttuarisaanermi ataastimooruterpassuaqarput. Naalagaaffeqatigiinnermi attaveqarneq ukiuni kingullerni100-likkaani pinikuuvoq, taanna oqarpoq.
Kalaallit Nunaat, Danmarki Savalimmiullu “ataatsimoornikkut angusaqarnerusinnaanerat” oqariartuutigalugu Søren Gadep oqalugiarnini naggaserpaa.
Jens-Frederik Nielsenip pulaartut allaffigisartagaannut inuulluaqqusunermik pulaarnini naggaserpaa.
Jens-Frederik Nielsenip Folketingimut ataatsimiigiannginnermini Kunngi Frederik ilassivaa. Kalaallit Nunaannut ullumi aallaqatigiissapput.
