Tusagassiuutit: Aappariit Vancekkut tikeraarnerat minnerpaamik 5 millionit koruuninik akeqarpoq
- Amerikamiut nunatsinnut tikeraarnerat politiinut katillugit 5.032.058 koruuninik akeqarsimasoq naalagaaffiup politiivisa ilisimatitsissutigaat.
Washingtonimiit qaammatialunnguit qaangiummata tikeraartoqarnerani, politiit qanoq akiliitigisimanersut apeqqutigineqarmat, Folketinget-miit, danskit folketingimiit ilaasortaatitaat Peter Skaarup (Danmarksdemokraterne), taama akivoq.
USA-p vicepræsidentia J.D. Vance, nulialu Usha Vance, Sisimiut Nuullu tikeraarniarlugu marsip naanerani nalunaarput.
Politiit tikeraartoqarniarneranik paasitinneqaramik Danmarkimi politeeqarfinnut ikiortiserinninniarlutik attaveqarput. Ullualunnguit qaangiummata timmisartut politiinik, qimminik paarsisunik, politiillu biiliinik saniatigut allanik ilaasoqarlutik Nuummut tikipput.
Aningaasartuutigineqartut tamakkiisuunngitsut
Tikeraarnissaq taamaatiinnarneqarpoq, amerikamiullu Pituffik Spacebase tikeraaginnarpaat. Taassuma kingorna KNR-ip politiit oqaloqatiginerani, aningaasat qanoq amerlatigisut atorneqarneri, taakkua oqaatigerusunngilaat.
Maannali kisitsisissarsineqarpoq. BT taama allappoq.
Naalagaaffiulli politiivisa 5.032.058 koruunit aningaasartuutigisaanni kisitsisit tamakkiisuunngillat.
Tassami politiit timmisartumik siumut utimullu angalanerannut aningaasartuutigineqartut saqqummiunneqanngillat – kisitsisit Illersornissaqarfiup pigai.
