Annilaanganermik nalaatalinnut akeqanngitsumik ikiorsiummik nittartagaqalertoq

Kassutsitsineq, ajunaarnersuaqarnissaanik isumanerluuteqarneq, uulinneq toqulersutulluunniit misigineq. Annilaanganermik nalaatallit soorlu niuerniarnissaminnut bussernissaminnulluunniit annilaangasarput. Taamatulli nalaatalinnut akeqanngitsumik ikiorsiummik nittartagaqaleqqammerpoq.

Nittartagartaaq taanna mindhelper.gl-imik ateqarpoq. Annilaanganermik nalaataqarnerup qanoq misinnarsinnaaneranik assersuutit tamatumalu nammineerluni qanoq iliuuseqarfigineqarsinnaaneranik videoliaralugit ilitsersuutit nittartakkami tassani isiginnaarneqarsinnaapput. Nammineerluni qanoq isumassortoqarsinnaaneranik aamma ilitsersuuteqarpoq, taakkulu soorlu eqqarsaatinik misigissutsinillu aqutsinermut tunngasortaqarput.

Ilinniartunut siunnersuisarfiulluni aqqutissiuisarfiusoq, AQQUT, Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup ataani inissisimasuusoq, nittartakkamik taassuminnga pilersitsisuuvoq. Tassungalu saaffiginnittut ilarpassui annilaanganermik nalaataqartuusut, AQQUT-mmeersut maluginiarsimavaat.

- Saaffiginittut amerlanerpaartaat annilaanganermik assingusumilluunniit nalaataqarsorisuusut maluginiarparput, AQQUT-mi pisortaq Christine Tønnesen oqarpoq.

Annilaanganermik nalaataqarnerup namminneerluni iliuuseqarfiginissaa ilikkarneqarsinnaasoq

- Annilaanganermik nalaataqarneq ernummateqarnermik misigeqqikkusunngisamillu nalaataqaqqinnissamik aarleqquteqarnermik aallaaveqakkajuppoq. Ernummateqarnerlu annilaanganermik nalaataqartuni initoorujussuusarpoq, ilinniartunut siunnersuisarfiup pisortaa oqarpoq.

Taamaammat ilitsersuutit annilaangermik nalaataqarnissap ingalassimanissaanut ernummatit nammineerluni qanoq iliuuseqarfigisinnaanerannut tunngapput. Nammineerluni qanoq isumassortoqarsinnaaneranut ilitsersuut taakkununnga aamma ilaavoq.

- Annilaanganermik nalaataqarnermut ersiutit assigiinngitsorpassuusinnaapput. Ilaasa uteqqiattumik ilaasalu ilaannikkuinnaq atortarpaat, ilaalu assigiinngitsorpaalutsigut atortarpaat. Assersuutigalugu ilaasa inussinissartik misigeriikkaminnulluunniit nuanniitsumut assingusumik nalaataqaqqinnissartik annilaangatigisarpaat, Christine Tønnesen oqarpoq nangillunilu:

- Annilaanganermilli nalaataqarnerup nammineerluni qanoq iliuuseqarfiginissaanut ilitsersuutit inuppassuit iluaqutigisinnaakutsorpaat.

Allanut aamma tunngasunik immersulersaaraat

Mindhelper.gl annilaanganermik nalaatalinnut iluaqutaassasoq, nittartakkamik taassuminnga pilersitsisut neriuutigalugulu ilimagaat. Nittartagarli taanna annilaanganermik nalaataqartut siunnersortimik qanimut oqaloqateqarnissaannut taarsiutigilersaanngikkitsik erseqqissaapput. Mindhelper.gl-imi tarnip tarnikkut ikiorsiisartumik tarnilluunniit pissusianik ilisimasalimmik oqaloqateqarnermut tapertatut neqeroorutaavoq.

Nittartagartaaq ilinniartunik siunnersuisarfimmut AQQUT-mmut saaffiginnittunuunerusoq innersuunneqartassaaq, allanilli tassa ilinniartuunngitsunit aamma aamma atugassaqqilluni.

AQQUT-ikkormiut nittartagaq pilersitartik annilaanganermik nalaataqarnermut tunngasuinnaanngitsunik allanulli aamma tunngasunik aamma immersulersaarpaat. Tamannarpiaq 2024-p ingerlanerani isummerfigissavaat.