Ukiuni sisamani suliniut nutaaq: Kalaallit inuusuttut tarnikkut ikiueqqaarnermik ilinniassapput

Danmarkimi Røde Korsit inuusuttaat Nunatsinnilu Røde Korsit inuusuttaat suliniummi nutaami suleqatigiillutik kalaallit inuusuttut imminut toqunnissamik eqqarsaateqartunut oqaloqatiginninnermik ikiueqqaarnissamut sakkussaqartilissavaat.

Allattoq Mikkel G. Rasmussen, Kim Hinrichsen

maajip 16-at 2023 10:25

Ikinngut imminut toqunnissamik eqqarsaateqartoq qanoq oqarfigineqassava, aamma atuaqat imigassamik atornerluiffiusumi peroriartorsimasoq qanoq ikorfartorneqassava?

Kalaallit inuusuttut ajornartorsiutinut taakkununnga maanna sungiusarneqalissapput.

Danmarkimi Røde Korsit inuusuttaat nunatsinnilu Røde Korsit inuusuttaat ataatsimoorlutik nunatsinni tamami inuusuttunut 2.000-inut tarnikkut ikiueqqaarnermik pikkorissaassapput.

Pikkorissaanerit inuusuttut inuunermi artorsarfiusumi imminnut oqaloqatigiissinnaanissaannut ikorfartornissaanullu iluaqutaassapput.

- Tarnip pissusaanik ilisimasallit allalluunniit ilisimasallit taarserniarsarinissaat siunertaanngilaq. Ilinniagassaalli tassaavoq inuppalaartumik kammalaatit ajornartorsiulerneranni qanoq ikiorsinnaaneraat, Kalaallit Røde Korsiata inuusuttaani KRK-INUA-ni suliniummi aqutsisoq, Erni Kristiansen oqarpoq.

Aamma atuarukInuusuttut pinaveersaartitsinissamut siunnersuutaat: Ikiorneqarnissaq sakkussallu ajornaannerusut

Ikiueqqaarnermik pikkorissartinnissaq inuusuttunit kalaallinit pisariaqartinneqartoq, Erni kristiansen nassuiaavoq.

- Kalaallit Nunaanni inuusuttorpassuit tarnip pissusaanik ilisimasalinnut allatulluunniit ikiortariaqarunik imaaliallaannaq attaveqqarsinnaanngillat. Ingamiik nunaqarfinni tamanna ersarilluni.

Tarnikkut ikiueqqaarneq

Tarnikkut ikiueqqaarneq nunarsuarmi sumiiffinni amerlasuuni Røde Korsinit atorneqartarpoq. Periuseq inunnut nalinginnaalluinnartunut tarnikkut ajornartoornermi imaluunniit atugarliortoqarnerani inoqatinut ikiuinissamut sakkussaqalersitsisarpoq.

- Ikiueqqaarnermi ilinniarneqassaaq kammalaatinit saaffigineqartilluni imminut toqunnissamik eqqarsartunik, taava taakku qanoq ikiorsinnaanerlugit imaluuniit tusarnaarsinnaanerlugit ilinniartitsissutigissallutigu taavalu immikkut ikiortariaqarpata tarnip pissusaanik ilisimasalinnut qanoq innersuunneqarsinnaanersut ilinniaritsissutigissaallutigu.

INUUSUTTUT NAMMINNEQ SAKKUSSAMINIK NOQQAASSUTEQARTUT

INUA AAMMA Ungdommens Røde Kors inuusuttut tarnikkut atugarisaannik pitsanngorsaaniarlutik ukiut arfineq-marluk sinnerlugit suleqatigiipput.

Meeqqat Illersuisuanit, MIO-mit nalunaarusiaq Qamani 2022-mi septembarimi saqqummerpoq, tassanilu inuusuttut 14-init 25-nut ukiullit nunatsinni imminut toquttoqartarnerata qaffasinneranik qanoq appassaaniartoqarsinnaaneranut oqariartuuteqarput.

Inuusuttut nalunaarusiami tassani imminnut ikiornissaminnut sakkussanik pisariaqartitsillutik erseqqissaatigaat. ’Inuusuttut ikinngutiminnik aliasuttunik imaluunniit imminut toqunnissamik eqqarsaateqartunik qanoq oqaloqatiginnissanerminnut sakkussaminnik kissaateqarput’, innersuussutini ilaatigut allassimavoq.

Nunatsinni inuusuttut imminnut toqoriaraluarnikuusimasut 15 procentiinnaat tarnip pissusianik ilisimasalimmik ikiorneqarnikuusimasut, Statens Institut for Folkesundhedimit nalunaarusiap takutippaa. Inuusuttullu tassunga taarsiullugu artorsaateqaraangamik ikinngutiminnut ilaquttaminnullu saaffiginnikkajupput.

Suliniut Nordeap aningaasaateqarfianit 6 millionit koruunit missaannik aningaasaliiffigineqarpoq, saniatigullu Folketingip partiivisa danskit 2023-mut aningaasanut inatsisissaanni Atlantikup avannaanut aningaasaliissutinit 6 millionit koruuninik aningaasaliiffigineqarluni.

Allisiguk

Inuusuttut tusarnaarluarsinnaanerullutik avatangiisiminni unammillernartunik isumaginnissinnaalerulerlutik ikinngutaalluarnerulernerisa saniatigut namminneq misigissutsitik aamma tusarnaarluarnerulersinnaagaat, Erni Kristiansen isumaqarpoq.

- Pikkorissaanerni ukunani imminut ikiornissartik aamma ilinniassavaat. Taakkununnga aamma atortussaateqarpugut. Imminut ikiorsinnaaneq tarnikkut ikiueqqaarsinnaanerup ilarujussuaraa, Erni Kristiansen oqarpoq.

Ajornartorsiuteqaruit imaluunniit imminut toqunnissamik eqqarsaateqaruit Tusaanngap oqarasuaataanut 80 11 80-imut sianersinnaavutit.

Nutaarsiassami kukkunermik nassaarsimaguit uunga allaffigineqarsinnaavugut.