Hollie: Anniaatikka taallanngortarpakka
Hollie Kielsen, 26-inik ukiulik, Qaqortumi inunngorlunilu peroriartortoq, qalipaasartutut eqqumiitsuliortuullunilu nipilersortartuuvoq. Ullumikkut tusagassiortunngorniarluni Nuummi najugaqarpoq. Taanna inunnguutsitut suiaassutsip akerlianik kinaassuseqarpoq, Qaqortoq illoqarfigisimasani qimallugu illoqarfissuarmut nuuppoq, tassami misigigami illoqarfigisimasamini kinaassutsini inissaqartinneqanngitsoq.
Hollie meeraagami uppertut akornanni peroriartorpoq. Kinaassusinili upperisamut tulluutinngimmat, maannakkut nammineq upperisaqarunnaarnikuulluni oqaluttuaraa. Nukappiaraalluni inunngorpoq, inersimasunngoramilu suiaassutsini arnatut nalunaarsorneqarsimalertippaa.
Ilisimavaalu taamatut, nammineq oqarnera naapertorlugu, inunnit nuannarineqarnavianngitsoq, nalunngilaami upperisaq inuit ilaannut qanoq pingaaruteqartigisoq.
Taalliamini kingullermi "I'm an Alien"-imi ilaatigut aaqqissuussamik qinngarsuineq upperisarsiornermit pilersinneqarnerarpaa. Tassanilu saqqummersinniarsimavaa suiaassutsikkut kinaassutsini upperisaminngaanniit ajortutut isumaqarfigineqartoq. Tamannalumi misigisareersimavaa, taanna oqaluttuarpoq.
-Uanga kinaassusera ajortutut isigineqarami.
Unnukkut aqqusinikkoorusunneq ajorpoq
Hollie Kielsen unnukkut anerusunneq ajorpoq. Taassumami qunugisarpaa akeqqersimaartunik naapitsinissani. Ilaatigooriarlunimi oqaatsinik sakkortuunik imminerminut aniatitsisartunik nakkarsaaniarsarisunik naapitsisarpoq. Ataasiarluni saassutsilluni misigisimavaa, qujanartumilli ajoqusersimanani, Hollie Kielsen taama oqaluttuarpoq.
-Kisianni tassa taamatut kinaassuseqarnerma kingunerisaanik sakkortuumik akeqqersimaarfigineqartarpunga.
-Inuiaqatigiinni pissutsit naammaginngisakka unneqqarillunga taalliarisarpakka, taanna taama oqarpoq. Uanga misigissutsikka assigiinngitsut pappilissamut allallugit taallanngorlugit qaangerniartarpakka.
Hollie-lli tamakkua pillugit tarnikkut ikiorserneqarnissani nalorsaatigisarpaa, anniaatinilu taamaasilluni taallatigut aniatittarpai.
Hollie Kielsen isumaqarpoq, inunnguutsitut suiaassutsip akerlianik kinaassusillit pillugit ammasumik eqqarsarneq inuiaqatigiinni amigaatigineqartoq, taamaattumillu killissamik qaangiinialaarluni paquminalaartunik, taanna naapertorlugu suiaaqatiminoortuuneq pillugu taalliortarpoq.
-Assigiinngiiaarnerput ataqqisariaqarparput.
Qujanartumimmi ullutsinni uunga killissimavugut, inuit arlalitsigut assigiinngiiaartuulluta. Hollie-llu kiffaanngissuseqarluni namminiusinnaanissani piumasaqaatigaa.
-Kisimiikkaangama eqqarsarneq ajorpunga allaanerullunga, isorinninnianilli naapitsigaangama malugilertarsimavara nalinginnaavallaarnanga, taanna taama oqarpoq.
-Nunarsuarmioqataasutut inuiaqatigiit akornanni tikilluaqqussaasutut misigerusuppunga, Hollie Kielsen oqarpoq.
Kisimiinngilaq
Inunnimmi naapitaqartarpoq kinaassutsiminnik toqqorterisut, inunnut amerlanngitsunut kinaassusertik saqqummiunnikuugaat. Taanna naapertorlugu taakkusartut allaanerunertik peqqutigigunarlugu imminortartut. Taakkuuppullu allaanerullutik misigisunut Hollie Kielsenip erinarsuutiminik taalliaminillu iliuuseqarfigerusuttaqai.
– Oqaloqatigiitta imminut toqunnissamik eqqarsartarneq pillugu, aammalu inuit tamarmik inuiaqatigiinni inissaqartinneqartariaqarnerat pillugu oqallitta, Hollie Kielsen oqarpoq.
