Assi: KNR

Aningaasaqarnermut siunnersuisooqatigiit: Akitsuusersuinissaq aaqqissutaaginnarallarpoq

Kalaallit Nunaanni aningaasaqarnermut siunnersuisoqatigiit aningaasanut inatsimmut siunnersuut isornartoqartippaat. Akitsuusersuinissat ukiunilu arlalinni amigartooruteqarluni ingerlaneq, siunnersuisooqatigiit siulersuisuisa ukiumoortumik nalunaarusiaanni erseqqissumik tamanna isornartorsiorneqarluni.

Kalaallit Nunaata aningaasaaqarnerata maanna inissisimanera pillugu siunnersuisooqatigiit siulittaasua, Torben M. Andersen ippassaaq saqqummeereernermini ilaatigut ima oqarpoq.

- Kalaallit Nunaata aningaasaqarneranut tunngatillugu tamanna marlunnik assigiinngitsunik oqaatigineqarsinnaavoq. Siullertut, maannakkorpiaq aningaasaqarneq siuariartorpoq, aningaasatigullu pitsaasumik ingerlaartoqaraluarluni. Aappaattulli unammilligassarujussuuvoq, Namminersorlutik Oqartussat kommunillu aningaaqarnertik ataqatigiisissagunikku siunissaq ungasinnerusoq eqqarsaatigalugu annertuunik isumaginninnikkut tunngasunik aningaasaliisarnikkut unammilligassaqarput, Aningaasaqarnermut Siunnersuisooqatigiinni siulittaasoq, Torben M. Andersen oqarpoq.

Naalakkersuisulli aningaasartuutigut unammilligassaat alla eqqarsaatigineqartariaqarpoq, tassalu Nunatsinni innuttaasut amerligaluttuinnarutu ukioqqortusiartorneri, tassalu taakku aamma aningaasartuuteqarfigineqartussaassallutik.

- Siunissaq eqqarsaartigigutsigu utoqqartaasut amerliartortillugit ullumikkullu tapisisarnerit atuuttut eqqarsaatigalugit tamanna annertuumik aningaasartuuteqarfiusussaavoq, taamaalilluni 'dødens gab'-mik taaneqartartoq, tassa amigartooruteqarnerup annertusigaluttuinnarneranik tamanna kinguneqartussaassalluni. Tamannaannarluunniit eqqarsaatigigaanni Kalaallit Nunaata aningaasaqarnera allanngortinneqartariaqarpoq, Torben M. Andersen oqarpoq.

AAMMA ATUARUK Naaja Nathanielsen: Ajornartorsiutip qitera saassuttariaqarparput

Inatsisartut ukiaanerani ataatsimiinnissaat tallimanngorpat aallartissaaq, tassanilu aappaagumut aningaasanut inatsisissaq amigartooruteqarfiusussaq, oqallisigineqassaaq kingusinnerusukkullu akuersissutigineqartussaassalluni.

- Pingaaruteqarluinnarpoq, aaqqissuusseqqinnissanut pilersaarutit saqqummiunneqareersullu Naalakkersuisunit attatiinnarneqarnissaat naammassineqarnissaallu. Aaqqissuusseqqinnisat qanoq imaqarnersut suli ilisimanngikkaluarpavut, kisianni pingaaruteqarpoq aaqqiissuusseqqinnerit piviusunngortinneqarnissaat. Aaqqissuusseqqinnerit kingunerisariaqarpaat ajornartorsiutit aaqqiissuteqarfigineqarnissaat, maannakkummi suliarineqanngippata tamanna poltikkikkut ajornartorsiutinngorsinnaalluarpoq, aningaasaqarnermut tunngasunut ilisimatooq, Torben M. Andersen oqarpoq.

Amigartoorutissallu, Dødens gab-mik danskisut taaneqartartoq, annikillisinniarlugu Naalakkersuisut akitsuusersuiniarput, pingaartumik aalisarnerup iluani.

- Akitsuusersuinissamut pilersaarutaasut annanniutaannaapput, tassa amigartoorutinik matussusiiginnarallartussaallutik. Oqartoqarsinnaavoq akitsuusersuinissat matussusiiginnassapput siunissaq ungasinnerusoq eqqarsaatigalugu aaqqiissutaasinnaanani, Aningaasaqarnermut siunnersuisooqatigiit siulittaasuat, Torben M. Andersen taama oqarpoq.

Isummersuutit


 

Pages