Aningaasaqarnermut naalakkersuisoq Kirkegaardip akerlilerpaa
Nunanit allaneersut aningaasaliisarnerannut tunngasumik KNR-ip ippassigami ilanngutassiaqarneranut oqaaseqarluni Jens-Erik Kirkegaard taama uparuaavoq.
Nunatta karsia ukiorpassuarni inuussutissarsiutitigut suliniutinut aningaasaliisartussatut isiginiarneqarsimanerarlugu, aningaasaqarnermut naalakkersuisoq Randi Vestergaard Evaldsen ilanngutassiami oqaaseqarpoq.
Aamma atuaruk Randi: Aningaasalersuisartut avataaneersut isiginiarsinnaanerusariaqarpagut
Nunatsinnili inuussutissarsiutinut suliniuteqarnernik tapersersuiniaraanni aningaasaateqarfiit nunanit allaneersut tatigilerneruniarlugit, politikerit innuttaasullu akornanni eqqarsartaatsimik allannguisoqartariaqartoq, aamma oqaatigaa.
Aleqa Hammondip naalakkersuisuutitaqarnerani Inuussutissarsiornermut aatsitassanullu akisussaasuusimasoq, Jens-Erik Kirkegaard isumaqarpoq politikerit piffissami sivisuumi taakkunannga aningaasaliisitsiniartartut, assersuutigalugu mittarfeqarfinnik sanaartornerni.
Aamma atuaruk Nunani allamiut issittumi aningaasalersuinissaq pilerngukkaat
Aamma atuaruk Aningaasaateqarfeqarnissamik siunnersuuteqarnissaq Randip naatsortuutigaa
- Ilisimaneqarluarpoq Nunarput qinigaaffinni arlalinni qaaqqusillunilu pilerisaarisartoq - ilaatigut aatsitassaqarnermi suliffissuaqarnernut atortulersuutinullu tunngasunik nunanut allanut oqaaseqarnermi, Jens-Erik Kirkegaard KNR-ip nittartagaani allappoq.
Nunanit allaneersunik aningaasaliisinnaasunik oqaloqateqarnerit pimoorunnerusariaqartut Kirkegaardip Randi Vestergaard Evaldsen kaammattorpaa.