Aningaasaateqarfeqarnissamik siunnersuuteqarnissaq Randip naatsortuutigaa
Danskit naalagaaffiata aningaaasaliiffigisaanik, inuussutissarsiutinik aallartitsiniarluni suliniutinut atugassamik qallunaat kalaallillu aningaasaateqarfimmik aningaasaliisartumik pilersitsinissamik isumaat Demokraatit siulittaasuata, aningaasaqarnermut naalakkersuisup, Randi Vestergaard Evaldsenip, tapersersorpaa.
- Suli Demokraatininngaanniit eqqartugarivarput aammalu eqqarsaatersuutigalugu naalakkersuisunut saqqummiutissallugu isumaa. Randi Vestergaard Evaldsen oqarpoq.
Aamma atuaruk Aningaasaliissuteqarnissamik kissaateqarnissaq Løkkep utaqqivaa
Isumaa taanna inissisimaffimmi siuliata Anda Uldumip qallunaallu partiiata Radikale Venstrep 2014-imi saqqummiutereernikuaat, soorlu aamma Inuit Ataqatigiit taama ittumik siunnersuuteqareersoq.
Ministeriuneq Lars Løkke Rasmussen qanitukkut oqarpoq, namminersorlutik inuussutissarsiortut nunani allaneersut nunatsinnut aggersarniarlugit qallunaat kalaallillu akileraarutaat atorlugit aningaasaateqarfiliornissamik oqaloqatigiissuteqarnissamut piareersimalluni.
Aningaasaateqarfiliornissamilli kissaat Namminersorlutik Oqartussaniit pisortatigoortumik imminut apuunneqartariaqartoq erseqqissaavoq. Taamaaliortoqarsimanngilarlu.
Sinaakkutissat oqaluuserineqaqqaassapput
Tamatumunngali aningaasaliisartumik aningaasaateqarfiliussagaanni sinaakkutassai Nunatsinni oqaluuserineqaqqaartariaqartut, Randi Vestergaard Evaldsen oqarpoq.
- Uani eqqarsaatigisassat amerlasoorujussuupput. Kalaallit Nunatsinnut sunniutissai. Aningaasaleerusuttut aningaasaliiginnarneq ajorput. Aningaasaleerusuttoqassappat uagut Kalaallit Nunatsinningaanniit arlaatigut tunisisussaaavugut. Taannalu eqqarsaatersuut eqqarsaatigisassarujussuuvoq, Randi Vestergaard Evaldsen oqarpoq.
Taassuma timmisartoqarfinni, ilinniartitaanermi pinngortitarlu atorlugu nukissiuutinik aningaasaliisoqarsinnaasoq eqqarsaatigaa, aammali aningaasaliinerit taamaattut Nunatsinni suliffinnik pilersitsisariaqartut oqarluni.
